يوم السب

يومنا القُمنا من ناس دِكَّة المَتْبوره
وقطَعْنا الوادي بايتين بي صباح حَمُّورَه
الْبِلْ شَلَّقَتْ فوق الفَجاج مجبوره
واخوان فاطني ليها بسوّو طَقْ الكوره

يوم السََبْ عَصُرْ ودّعْنا نحن عربنا
بي يوم الاحد قُمنا وعزلنا جلبنا
الفَرَقَه اتْفاسَحَتْ للساعه ما قَرَّبنا
شادِّين حيلنا ما جانا الخبير سَرَّبْنا

يوم السَّبْ عَصُر كَرْتَنَّا زادنا مَرَقْنا
بي يوم الاحد من الدَّمَرْ شَلَّقْنا
نحن رزِقْنا في حبال النَّجِمْ عَلَّقْنا
وعلي الدايرنا والمابينا تاني فَرَقْنا

ماشِّين نحن لي ليبيا البلودها بعيد
وما شُفْناها دايرين عيل نشوفها جديد
ام كَزَم الغُرْ سنونها وتَوَّها فريهيد
تَرَكنا بلودها عُقْباني ووداعْة السيد

جينا عَقَلْنا عِنْ قَلْب البعير بي صعيدو
اصْبَحْنا دنينا تاسْمير الجِمال لي شديدو
الفوف فَكَّ فوقنا الجَوْ واذانا بَرِيدو
ياساتِرْنا ما نجيب خَسْلِي لي البِنْريدو

حَدَبْ ليبيا البلودو سَفافي
يِسْتُرنا الله بي عَقَباتو تَبْقي العافِي
ام سوقاً رَقَّ ابوفَهَقَه النّوايبو مَشافي
والجَقْ الفوقو كاتبين مارْكَة الرَّيَّافي

مَشِي السِّقْريرِي والحَدَبْ البِحَزْمو رهابو
قَلَعَتْ نَجَّعَتْنا وشَرَّكَتْ مادَّابو
المات فارَقْ آناس وانْقَطَعْ مُضْرابو
والحَيْ اصلو بِرْجَعْ وبِسْتَبين في عَقَابو

لاها السّاعَه مادَّه الخَضْرَه ابَتْ ما تيَقِّنْ
حَدْ ما تَطْلَعْ العَتْمور تشوفو مدَقِّنْ
بَرَمَتْ عينها شافَتْ البي قَفَاها انْرَقِّن
وبِتْسَوِّيلْنا في طَلَقْ الكِلابْ اللَّقِّن

يَمْ الخَضْرَه شين وقبيح وما بتَتْماشي
حِسْ كِرعيها في الارض التَّقول حَشَّاشَه
سَنَدَتْ راسها والاضنين بِقَنْ طَرَّاشه
ضَلَّ رحيلها فوق الْبِل رميض وحُوَاشَه

جِلْدَهَا شوفو كيف توب الحرير يِتْلَمَّع
إنْ ما عَجَّزَتْ شَرْطْ سيدها ما بِتْطَمَّع
دَارْت السَّوق وفي الدَّرْبْ قَنَّبَتْ تتْجَمَّع
حِسْ كِرعيها نَقْنَاقَاً لِقَالو مَشَمَّع