زمنا قبيل

زَمَنَّا قبيلِ خَمَجوهْ وعاشو فيهو رجال
زَمَنَّا قبيل زمان البُرْقْ بنات دَبَّال
سيدهِنْ مِمَّهِلْ ما براعي لي المُرْسال
وياحليل الدَّليلهِنْ سالم ود رَحَّال
ابوسَرْجاً عَفَسْ دَبُّوكَة الرَّقَّال
خِميجان بِنْقُرْ القُلَّه وكَرَفْلو حيال
وفي ايّام الدَّهَاريب لَقَّحْ الاتْرار
طَبَقْ الهيجي في اللَّقَحَه ووقَفْ نَبَّال
ووقَعَنْ قَشَّةْ الجادولو فيهو زَوَال
والسَّعَدَانْ مِفَرِّش والمَطَرْ هَطَّال
والباطْلِي القبيل مَدِّن سِراها عدال
الحَشَّاو انْشَبَكْ في فَدْرَة العَجَّال
وفي شِقْ المِراح بِتْصَرْعَنْ الاعْتَال
الهِرْديم لي المَخَوَّلْ قَصَّرْ الدَّنْبَال
بِرَحِّبْ بي الضيوف ماهو المِدَنْقِرْ ضال
والزَّاد بي السَّناديك ما عَبَر بي رطال
دَمَرْ في التُّرْدَه لامن طارَتْ اُم بَشَّار
وجي حاكّ الجَبَل وادَّا الدَّميري يسار
ووقَعَنْ قَشَّة البَضْرَه المِشابْكي النّال
واصبح بي المَقَامَه وجَلْوَلْ الافكار
ولي دور العَرَبْ رَسَّلُّو ليهو عيال
ما شالو الرَّسَنْ قَجُّوهو في ابوخلال
ابو دوماً بِهَتِّفْ في الفِقَرْ سَيَّال
قامو مَعَ الصَّبَاح وَكْت النهار اندار
قال دور العرب اللّيلي جَنُّو جمال
والكوراك طَقَّ قَطَعو الشَّكْ علي ابوخلال
ضيل الفَرْوَه بِنْسِف في البطان الجال
بَعَد ما نَزَّلو الناس العزاز واصال
انْلَمُّو لي الكَرَامه وقَسَّموهو الفال
وحَلَّقْ بي البيوت الخَشْمو مو نَجَّال
وقال بُكْرَه السَّفَرْ قالولو ماشي الحال
مادانو اللَّزوم اللي الرَّحَلْ شَيَّال
واِنْ حَضَّتُو الحَوِيَّه مِنُّو مو مَلْمَال
البَرَّام دَقْ صِغَيْرَه وصابْرَه مو حَلّال
وابوخُرْسْ مِنْ بَكَانو الفيهو ما بِنْشال
بَسَطو العاطِلْ الحارْس الفريق وَكَّال
واللَّحَّاقَه قامَتْ من حريم لي رجال
نَزَلو الفي عُلوهو ام شُورَه جات مُقْبال
الوَاوَايْ المَعَرْجَلْ دَاكا حِسْ جَرْوال
حليمي ناس سَعَدْ عَشُّوها في اللَّبْهال
والدنيا خَرْباني ما بضَلِّي العُمُر كان طال