أنقت بينا

أنقــَت بينا من رِد العناق ام سوح
ومسكـَت صحرا يات من شافها قال يانوح
عوووووووك يا صاحب القبة البــِكتْــبْ اللوح
حس سيطانَّا فوق ضهر الردوف والشوح

الليلى الخبير ردالنا نفــّا حار
وضرب الصهبة خبَّت وشبَّت الحجَّار
قال إنكربو يبقى شرابكن الفنجال
دريب السكة دى اخوان فاطنى فيهو قلاّلْ

أنا قلتْ ليهو تب ما تخاف
دوادريب لى الشرور من قمنا ليها صداف
مانا عطالة يا ابو ام عِزّه نحنا خفاف
أنا أخو الديسو كربَل قالِب العسـَاف

إتبارولها شيابنا الضروس إثنين
أٌ ما خلوها تتراهَــب مشيــَّأً شين
كان غلبَك مشى الهيالة بى النعلين
أركب فى الجمل قول العدَل بى وين ؟

أصِلها الصحرا فيها عوايد
ىا بذورنا بتلم الضرس والبايِد
شيلو بعضكٌنْ أطروا الفى الكريبة مصايد
طبيقك كلَّا رجيهو الجمَل يا زايد

شٍن وداكا يا السواق تبارى أم جورى ؟
وبتطريكا لى الحلة وركوب اللورى
أعـَدْلى مشيكى بى العتمور محل ما تدورى
ما تِنغشى راجنك حرَس بذورى

إنتَ قبيلى شِن وداك
تسيب اللورى والحَلة ام طبيخة حداك ؟؟؟
حيلك شدو لسه ما فى شيــَّاً جاك
شيل نعليكا وأركب فى الإعيور داك ..

حيلك شدو عقبان تانى ما تتجرَس
حبوبتك صافحت أمك قريب تتعرَس
تلّب ليها قدوره وعليهِن كرَّس
شيل نعليكا وأركب فى الجمل وأتحرَّص