تضاد
إبتهاج نصر الدين
وسرقت لحظة فرحه
من جبل الهموم دسيتها
في الضحكه العجوله…
إنتميت للبسمه
في زمن العبوس
بس خفت غدر الناس يطولا…
يا مواضيعنا الملوله..
خلي بينا وبين
يباس الحال مسافه
توطن اللين والسهوله…
أبقي تيراب البشاشه
كلما الأحزان تبتق
تنتشر بكل فلولا….
قمنا جينا
على بيوتات الفكاهه
الهموم بذاتا ياخ ختفت رجولا…
سابقتنا وجات تحندك
إنو قد مات البلوله!…
يا مشاكلك يابلادي
اليومي تكبر
ومانا ساعين لحلولا!!!
الف رحمه عليها
ديل أحزاب وعسكر مانظامي
شيعوها بدون غسولا…
كلو مننا…
ما أظن همانا زينك
نحن صفحه بتعني شينك
يا الربى الطاهره البتوله ….
كلو من أزمة ضميرنا
ومن إرادتنا الكسوله …
متين حنصحى
متين حنكسر
كل إيد تاخد عموله…
حيلنا في النضم الولا
كان منو فايده
وفي أُمور ما صاح نقولا….
متين حتكبري
لو هموم سمسارنا تصغري
شوف تضاد الوضعِ هُولا !