جلسة في مكان ما
انا عندي ليك عرضاً جميل
كدا هسه بُصي وكشّفي
قلبي المبلل لو بِرد
بي فوط غرامك نشفي
دكة بديلات العِشق
خليها تجهز للدخول
تلبس نعيلات الالق
كابتن هواك قال لياشي
انو النجوم الفي السما
جاين ضيوف هذا المسا
هم هسه في صالة الوصول
صوت الزغاريد انطلق
وانا لسة حافظ للوعود
وحافظ ملامح الجلسة ديك
مبدية بسورة الفلق
والكرنفال بدا وانطلق
كان قلبي حسى بأنو خايف
من دموع جور الزمن
يدفقن يسقن شرايين الوجع
الكان دخل في قلبي عامل شكل ضيف.
قام استقرى ومارجع
والحر شديد والدنيا صيف
في قلبي جمب المنتجع
كان مستقر في ضل رهيف
جم عُش بنيات البجع
قام ردد القلب الحزين
غنياتو بنفس السجع
اه ياوجع …. انا ااااه ياوجع.
اااه اااه ياوجع … انا اااه ياوجع
ومازلنا موجوعين شديد
ونقاسي في شمس الضحى
والناس تزلق في الجليد
من كتر مازاد الالم
لما انفجر عِرق الوريد
وتقول لي قلبك انظلم
منا قلبي قبلك مات شهيد
شيعوه بنشيد العلم
وإت كنت ماحافظ النشيد
منا سور هوي وكتين وقع
كان حيط هواك متين شديد
لا تقارن الحر بالجمر
عمرو الحزن ماليهو عيد