غلطة

بكتب عليك مابس

عشان حِس الغُنا

لا بس عشان ابيات غناك

في زكرياتي مدونة

والريدة زي قوس القُزح

أشكال هواها ملونة

بس لون هواك بالجد فريد

غالبني أوصِفوا ليك أنا

صبرك بفتِق للجِراح بُعدك

هو ما بِبرُد حشى

أنا ما رشيتك شان تعود

لا قلبي فكر يوم رشى

قلبك عنيد رغم الوعود

زاد العِناد سافر مشى

خلى الحزن ظلل سماي

أيامي بعدك ورنشة

عدت سنين فاتت سنين

وانا لسى راجيك منتظِر

لا جيت تصرِح بالوداع لا

سبت قلبك يعتذِر

خليتني غرقان في بحور

من منبع الدمع الغَذِر

ياريتو قلبك مِني خاف

أو قلبي مِنك كان حذِر

سوي البعجبك في هواك

انا ما بلومك للحصل

في الريدة ما عايش براك

انا قلبي مِنك إنفصل

غلطة إني وثقت فيك

بهديك من اروع خِصل

كانت حياتنا رِواية بس

معدومة من دور البطل