حاجة قريبة منك
إنتي زعلانة وأظنك ماكي عارفه سؤالي عنك
يالزيزة الكلك يجنك عايز اكون انا أبقى منك
أي حاجة قريبة منك
كان أبوكي كان أخوكي أبقى أمك
أبقى واحد من ضيوفكم أبقى عمك
تبقي ناظرة أبقى أستاذ
تبقي شكلة أبقى حجّاز
تبقى صورة أبقى برواز
تبقي بقرة أبقى أمباز
و يا سلاااام لو تبقي بوتجاز
و تحرقيني وما مهم لو تحرقيني
المهم شوفت عيونك
وأبقى منك أي حاجة قريبة منك
تبقي أستاذ أبقى ألفه
تبقي شباك أبقى ضلفه
تبقي عيان أبقى سلفه
تبلعيها وتبلعيني وما مهم لو تبلعيني
المهم شوفت عيونك
و أبقى منك اي حاجه قريبه منك
تبقي طربيزة أبقى كرسي
تبقي راكب أبقى تكسي
بيكي أسافر لأم دقرسي
وتبقي حافلة أبقى بوكسي
وياسلااام لو أبقى ببسي
تشربيني ، تقرطعيني ، تدفقيني
و ما مهم لو تدفقيني
المهم شوفت عيونك
و أبقى منك أي حاجة قريبه منك
تبقي “تاكا” أبقى كسلا
تبقي غابة أبقى أصلة
تبقي سلطة أبقى بصلة
تبقي حيطة أبقى عتلة
شرعيني وهدميني ومامهم لو تهدميني
المهم شوفت عيونك
وابقي منك أي حاجة قريبة منك
تبقي وردي أبقى ترباس
تبقي سانتو أبقى كدباس
تبقي بنكي أبقى حراس
تبقي برعي أبقى عباس
تبقي أوبرا أبقى ترباس
تبقي غرقان أبقي رفاس
رفسيني وفتشيني وغرقيني وفنجطيني
و ما مهم لو تفنجطيني
المهم شوفت عيونك
وابقي أي حاجه قريبة منك
تبقي فالق أبقى مفلوق
تبقي كسره أبقى طايوق
تبقي منفوخ أبقى مطفوق
تبقي ويكة أبقى لايوق
تبقي شناق أبقى مشنوق
تبقي حراق أبقى محروق
وياسلااام لو تبقي خازوق
مقلبيني وزهجيني وعكريني
و ما مهم لو تزهجيني
المهم شوفت عيونك
و أبقى منك أي حاجة قريبة منك
تبقي حيطة أبقى طوبة
تبقي روسيا أبقى كوبا
تبقي جمباظ أبقى هوبا
تبقي غنماية أبقى لوبة
تبقي فاطمة أبقى زوبة
تبقي راس أنا أبقى قوبة
ألِّميني و عوريني و بشتنيني
وما مهم لو تبشتنيني
المهم شوفت عيونك
وأبقى منك أي حاجة قريبة منك
أبقى خصلة بين أيديك تسرحيها
أو مجلة بتقري فيها
او حفيرة لما تكنسي تدفنيها
وتدفنيني ومامهم لو تدفنيني
المهم شوفت عيونك
و أبقى منك أي حاجة قريبة منك
أبقى كتاب شايلاهو إيدك
تبقي ملكة و أبقى واحد من عبيدك
أضربيني و رصصيني و ما مهم لو تضربيني
المهم شوفت عيونك
و أبقى منك أي حاجة قريبة منك
ذرة من ذرات غباركم
درجة واحدة من حرارة نص نهاركم
قشة من قشات خداركم
تمعطيها وتمعطيني وما مهم لو تمعطيني
بس المهم شوفت عيونك
وأبقى منك أي حاجة قريبة منك
ماكي زعلانة و أظنك
يادوب عرفتي سؤالي عنك
يالزيزة الكلك يجنك
عايز أكون أنا أبقى منك أي حاجة قريبة منك
