مانديلا

قالت ليهو : مالك بتاكل السندويتش حفار حفار
انت فار ؟

قال ليها : بقيت مجنون بقيت محتار
بعد ما زول طويل عريض
انا فار ؟؟؟
يا احلى كديسه في الدنيا
عليك ربك تبلعيني
وماتفضلي شي..
وكان ده حصل بكون يا بُرّة اسعد فار

وانطط جوه في بطنك
وانغص فيها للاسرار
واقيف اتـأمل الكبده
و الطوحال..تقول رادار
واخزن جوه في المعده
وافتش لي لكسره ما القى
واقبل جاي ده همبرغر
وكمان بي جاي جلي وكاستر
وكمان بهناك عصير مانجا..
وكمان اصفــــــــــــــــــــــــــر
مصارينها مستّفة بي عسل سكر
مش زي مصارين السماني
ملفلفه زي حبال بمبر ..
واطير ليك فوووو
وفي الفشفاش اتحكّر
وانط طوالي جنب قلبك
واشوف الدم هداك احمـــــــــــر..
ابحلق جوه في بطنك
اعاين القى صورتي انا..؟؟صورة الفار!!

اها يا عالم ده ما سبب البلع زاتو
اقول يا بره خارجيني..تقول لي نياو
عليك ربك تخارجيني..تقول لي نياو
بحبك ياخي خارجيني..تقول لي نياو

وتتوكل تتطلعني
من اجمل فيلا واحلى سجن
يمين من جوه فيها بطن
مفرهده زي زهور الفل
بتعمل نكهة النعناع
مطعمه بي طعم ليبتون
وفيها نسيم يجيك
بــــــــــــــــــــــــــــارد
مكندشه بس تقول هيلتون
ده من جوه..

ومن بره تحلف بس تقول
يازول واحد شد ليهو حبل
وربطه وفي القمر جره
ولما تجي وهناك تقعد
تقوم من تاني تنفره
واشوف الخاشي ماشي بره
واحس بي قلبي فرّ فرّ

سجنتيني وجاري وراك
مابنساك وما بتخلّى
حتى لو الزمن عاند
حتى لو السهم جلّى
بموت فيك موت
لانك انت
افريقيا
وانا البهواك …. مانديلا