العزابة

اقولها نصيحه ليك يابابا
أحذر جيرة العذابه
اهل الضمنه والكوتشينه
ديل اهل الطباع الشينه
ليهم مرة نحنا مشينا
لا اتغدينا لا اتعشينا

ولو وقعت ما بتنحل
حتى كان بقيت ذى بله
ديل القوم فى اى محله
نص الليل يشدو الحله
يعبو البيت زى الباخرة
وما بعرفوا السراير الفاخره
دفاتر الكل عليهم ساخرة
اصلو خلاص بيقت دين آخرة
ويخلوا البيت مبشتن ديمه
يدخلوا فيهو عدة قديمه
كمان لو فى شجرة نيمه
يكون وسخان وحالتو اليمه
الملايه ما مفروشه
وجوه الاوضه قامت كوشه
ست البيت تكورك فيهم
ديل اخوانا ضربوا قروشا

الغسال يكورك فيهم
والتاجر ابا يديهم
والجزار مشرك ليهم
يا خوانا عرفوا الفيهم
زحمة شديده فى الشماعه
ريحه كريهه فى البلاعه
ديل فى الحله عملوا مجاعه
شفطوا القره فى نص ساعه

ضد العرس رفعوا الرايه
ديل انحلوا من الدايه
لا تطعيم كمان لا رعايه
مافى كرامه ولا سمايه