القدومو قرقور

القَدُّومو قَرْقور النَّدَايَه السَّارِبْ
قالْج الحُوَّه رابْ زَبَد المِصاع في الشَّارِب
عانِجْ عُنْقُو لي المِقْمِيق وحِيلو عَقارِب
بِجيبلو ضراع فَرِقْ كونِيبو من الغارِب

العَزَبْ الدَّوَام لي الرَّاعي ما بِتْدَّاني
هايِج وسامِح الدَّابي النَّفَخْ وِرْدانَه
قارع اُمَّاتو بوليس شُرْطَه في ميدانه
حِسْ هُدَّارتو رَعَداً مِزْنَتو مراقدانا

إدَيَّاتَكْ مَداقيق في المَسَاتِي اتخلْفَنْ
راحاتَكْ بِخَمْشَنْ في التُّراب وبغَرْفَن
لي الغُزُلْ الضَّرَايِبْ وفي المَحاسَه اتْوَلْفَن
جيب رَحْ القَماري المِنْ اضاتْهِنْ قَفَّن

ياداب حَتَّي نايْبَكْ طاعِنْ
دوماتَكْ علي الكَنْكون بشوفْهِنْ ماعِنْ
اِيديك بَتَعَنْ علي هَكَرْ الدُّروبْ بِتْدَاعِنْ
تِتّقَمَّز تقول فاتيات مداين وصاعِنْ

مِتْشَنِّطْ أفَنْدِيَّاً مِغَيِّر ولابِسْ
تِفَنَكْ حَنَّنِنْ بول ام صَلايَاً عابِسْ
في الفَرَقَه العزَازَه وصَوْ وسَلَماً يابِسْ
كيف كَلْبْ المَراحيل في العَتَرْ بِتْكابِسْ

ود الباديه جي راكب الحروتو مزَيِّق
ماسك السِّكَّه إسعافاً جريحو مضيِّق
مَنَاسْمَه بوسِّعَنْ فوق الدِّريب الضَّيِّق
مِتعولي وحَشَاهْ مِنْ المَسَاسَاهْ رقيِّق

بشوف دوماتو جابَنْ نَزْ
إضْليم باجَه من ضَرْب السَّبيدَرْ فَزْ
ضَهَرو بلولي بَرْجاحَةْ صغير بِنْهَزْ
بَدْري برَاقِدْ العَيَّانْها وَاقِعْ خَزْ

دَنَّاي للمسافات ابْ خبيباً بارِد
ونَزَّاف دومو فوق سير الوَرَقْ مِتْزارِد
يومو الينوي لي ضامر الحَشَا المِتْمارِد
بِجيكا مخَوِّي كيف فَرْخ البلوم الوارِد

مَعْقوق مِنْ حُوَار لامَن بِقيتا مَخَوَّل
كاسر الصُّوفَه كيكو في الجِبال تتجوّل
ماكْ قَشَّاشي قيدك للرعيَّه مَطَوَّل
ميزك فَضْلَه فَتَريتاً نضيف ومَشَوَّل

الوادي ابْ كِتيراً شاق
وفيه اللَّيْلِي ديمه بسَرِّي بالنَّقْناق
مِنَّاكْ ليهُ دوراً شَبَّحْ الشَّقَّاق
بِدْنِيْ الخَبّو كَلْبَاً بي الدِّويديب ناق

بَعَد ما قَرَّبَتْ فَتَّاشَه
جاتَكْ فَنْقَه مِنْطَرْحَه وأرِضْ رَقَّاشه
خُفَّكْ مِنُّو مِنْشوف الشَّدَرْ بِتْماشي
صابِق عَفْرَتْ الرِّيع ام سَرَابْ وغَبَاشَه

طالْبْ الاُمَّه فِيْ بتِتْحَوَّسْ
كاضْم الجِرَّه مِن حَرَكْ السَّعِيَّه مَهَوَّس
بِدْنِيها القَفَاهْ بي البول ضَرِيره مَلَوَّس
العَرْقوبَهْ كيف حَطَب الحَنِيَّه مَقَوَّس

قال لي سيدي لا تكاليني
أنِيْ بلوليك وبالحارْدَلُّو نِمْ وادِّينِي
قُتْ ليِ حاشا شَمْسَكْ وَرَّكَتْ وَدّيِنِي
لي القَرْيافْها ماسْك العَنْقَرَه ورامينِي

مَنَاسْمَهْ مقَدِّدَه القَرْدود
بشوف عِسْرَاتَهْ طالقاتْ العَجَاجْ في الفُود
ضارْبْ الحُوَّه سنتين في النَّعَمْ مهدود
لامن فاشْرو قَنَّبْ في الضلوع مَجْعود