درقة الرغوة

درقة الرغوة كم دمّرتي ناس ومساكن
وكم ذلّيتي بعد العزّة شامخ وماكن
كم صبّحتي قلباً حي متلّجْ وراكن
وكم مسّيتي عمران زي مباني سواكنْ

الغني فيك يوسّع ولي الزيادة يكابس
في الَّليِّن مخضِّر وقلبو طاري اليابس
بسراع تدّي ضهرك ويبقَ وجهك عابس
وحالاً ينقلب عِريَان بعد مو لابس

خيرك ما بيدوم يا البهرج الغشّاشة
يا مطر المنيّة الديمة سابقة رشاشه
كم قصراً جميل أنوارو تضوي بشاشه
دمرتيهُ أصبح فاقد المقشاشه

عمارك لي خراب والفرحة فيك لي كربه
اسمك من ألست ..الفانية دار الغربه
أولك المعيشة جرى وتعب في غربه
والتانية الأمل والتالته دفن التربة

كم حطّمت راجلاً في مشيهو مشلّق
صبّحتيه بي حبل النكد متعلّق
دربك لي البصاحبك بي عجل بيزلّق
يا صقر القبور الفوقنا ديمه محلّق

تعصري على البريدك وتقربي تآنسيهو
يترك طاعة الخالق يكون ناسيهو
بي توب سحرك البعمي القلب تكسيهو
يصبح محتضر في تربتو تمسّيهو

سرورك ما بتم تابعاه ديمه الفجعة
ظاهرك لينا سكر ..إلا طعمك وجعه
كم طفّشتي مرتاح قلبو مابي النجعه
روحو تشابي وإنت قطعت خط الرجعه

شمس حسنك مخنّقة ما بدوم إشراقه
يا لعبة شليل عضم أبقبيح برّاقه
كم من ليهو منزل في جنان ورّاقه
خنت أسيادو هجّو ولجّو يا الفرّاقه

فيك الحي يأمّل والفرح يبدالو
ترقصي ليو يبّشر يفتكر رايدالو
لي الشبّال يميل ترميه يا اللّابدالو
تتني رقبتو يا الخاربه وتكوسي بدالو

أوصيك نفسي أوصيك ( الحيا وما فيها )
شق ود الاحد بيت الشّبر صافيها
لي متين تقنعي ونار الضلال تطفيها
تمسكي سكة الشّافوها حاجه تفيها

اتغشّينا في حبك لبسنا عبايه
يا موية الرّهاب الما ملت كبّايه
عجيب يا دنيا أمرك إلا نحن غبايه
عاشقين الجمال في لمعة الحربايه

تبقالك جنينه تمتّعك بثماره
ترقد في أمانها وتنهمك في عماره
باكر تبقى ليك حنظل تشوفو دماره
تسحب منّك النّعمه وتدق مسماره

دي الغشاشه دي الغدّارة دي الحقّاره
كم قلبت زغاريت عرس بي نقّاره
أعلنها بي حرب قبّال تشن الغاره
وقبل الروح تقرّب تبقى في الغرغاره

يا سامع دبيب النمله جوف العاتمة
يا كاشف الخفايا الفي الضمائر كاتمه
بي جاه سيد الرسل الكرام أبو فاطمة
لطفك بي عكير يوم الدفن والخاتمه