الخريف
فرجو قريب حقيقة بروش عذابنا طواها
انطفت ام لهيب والطرفة عم رواها
فروعا يابسة مدة الليلة شفنا نواها
فتقت جانا ذي نفس الاراكة هواها
السماء غيمة ظل ونجحت البكاية
والمحل القبيل خوفنا امسي حكاية
العجمية فرحت وحضنت الكاكاية
قرب الري نسيناها وربط وكاية
الحقن اتملت والدابي جاتو فضيحتو
غير خاطر مرق ضاقت عليهو فسيحتو
ادشة السرح كرفت هواهو منيحتو
والحمريب شهق فتح قزايز ريحتو
المرخ انتفض من تربة السفاية
بق طيرا خضاري لقالو مويه كفاية
الحيوان سرح لا رمضة لا حفاية
هيد الزيفة داير ليهو نار دفاية
السما كل ليل في ضيق وعوة وهرجة
ساريته بتلعلع لي الصبيب مندرجه
سيوف ضو البراريق ذي سيوف البرجة
تقع النقطة في الراس ذي ضربة القرجة
الخير عم وادي الشيخ ضمنا شرابو
بقى كل زول يبهلب همه في تيرابو
انفرجت علي البشحد يكوس بجرابو
والفاقد اللبن وعشاهو بتضارابو
شرب اب عدار هزو السيوف عربانو
والقرعة اصبحت سرفا طلق وبانو
شراريت جاها طوفان مارحم حبانو
وادي الدان نزل واهل المطامير بانو
اب كرمت كرب واتدله ليهو علاله
سو العاده في ابو سليم واخد حلاله
سيول ام الطيور ابي ينقطع شلاله
حمدا ليهو فراج العقد حلاله
لعوت الكرمشيب وقف اتعدل واتقنع
الهوى خلي يرقص وينتني ويترنع
الكعكول كتر لي المابي والبتدنع
الحمبق بقت منو الغنم تتمنع
السمبر صبر والمولى فرج كربو
في وكر السيال اب روبة سهل دربو
ماخاب الميقن وراجي رحمة ربو
منزل واحد الكون حفى شرقو وغربو
العواتيب شرب فوقو السواراب عرضو
والسنط المكنكش تاني فتح قرضو
القاشداي متسب سوا سالفو وغرضو
طلق ريح الصبا ورفع المطول مرضو
ام سعفات روت سيد التواريب عجل
الخير فوقها لاح غرة حصان ومخجل
الباجبار قوت عينة وعليها اترجل
امسي مقيلو فيها ونومو طرف الحرجل
ايد الوادي طبقت شربه فوق الشربه
رويانة ام جداية بي الطيور متربة
قيزان أم سدر لبست طواقي التربة
سيل أب حجله فوقها تملي زرقة حربة
شربانة الغريبات حالة طيبة مريه
قام الدنبلاب جاب نسمتو الخمرية
اسياد الكلاب التلفح القمرية
شمشو للقنيص والفره بالعامريه
الليلي الرزم قلس البلد حلقيبو
دق الحلقي دق الساريه بس ابو رقيبه
سيف برقو البكربج في السحاب من غيبة
عشرة سنين تمام من العيون في غيبه
شرب وادي المكابراب الحديثو منفل
الدرب التحت والفوق حجز واتقفل
لقت ايدها الحبارة الترعي والتتجفل
الخور خدروه من الغابة لي عند ارفل
كاكتي واب هشيم والعشرة خيرن دفق
الجبل أب فريوة على السعية اترفق
صقر الرخمة بي جنحاتو في الجو صفق
البكمة انضمن مرعاها زول ما بشفق
اتهز الهواد وردت سيولو الداوية
حسها من بعيد متل الصقور الخاويه
وادي ملاين العالياب كسر بي الحاوية
عرقو يسوي في الحمبي مشتلة لاويه
العينة انتكت بي النعمة والخير برق
الهم المصقر في القلوب اتفرق
الابالة كرمو بي الخروف الابرق
انفرجت علي المابنومو ناس ود ازرق
أب تغر اتقشط بي نعمة التواب
ركز وحشو البدور لي الخضار لواب
بق المعروض شراب اب رقوة والرواب
والاعجب خريف وادي الرخا التلواب
قامنبو العشا ولفة نهار هجمنبو
وشراب كمعة في تبا قفر وردنبو
شافن حايمة القناص واتزردنبو
اخدن حيل جناهن وكلهن ترزنبو
خريفها الفوقها اصبح بي كمال وجمال
خله الارض عروس في تيه وذوق ودلال
جايب سيلو عالي وواطي غيري سؤال
سقي الوديان صباح غاربا يمين وشمال
كريم رعدو البيرزم واتر الوبال
اكسى الارض خضارا لونو سر البال
بي لطف الكريم والاسمو اخرو الدال
شبعن البهايم وفرح الاطفال
