كتير القال

تلقى اللينا شاكر وتلقى لينا مِقلل
وتلقى الخته عينو على الجميِع ويحلل
الغزره إن مطر سمحه ومعاها نَهلل
علا العيش فرق ياقول مُحمّد شَلل

كتير البيصدر رايو دون إتدبّر
كتير المفتقد ريش الجناح وتنبّر
كتير الأدو سر اول مقابل خبّر
كتير الإنكسر عقبان بعد ماتجبّر

كتير القال سحابه وعل حقيقتو سموم
كتير القال رفاقتى وبكره قاله رموم
كتير الطالقه عينو وماسمع بى هموم
كتير القال خصوصى وكت تضيقلو عموم

كتير مو خاش معامع عِل سِمع بى السيف
كتير ذاكر خلاوى وما حلف لى ضيف
كتار القالو نحن وبل لعلو وكيف
علا كلام لسان ساكت مجاجه وزيف

كتير الماحوى ويذكرلك الحلّابه
كتير الماشرى ومحسوب من الجلابه
كتير المانفخ فى بعره لى العلّابه
لو عارف لدى لا الماشه لا الكلّابه

شفنا اللفظو سيئ ؤدار إقيم الدين
ؤشفنا تلاته رفقه وعلا متجبدين
شفنا القالو زعما ومن عوج لابدين
ان ناديت مؤيد إجوكه ناس عابدين

شفنا الفى المجالس همو قيلا وقال
شفنا العافه عمه وخت بديله عُقال
شفنا كسول جوارح سوا غيرو سِقال
شفنا الشرو دافقو وعِن بفيد وقّال

اصلو الزول مشافو حسب حوامتو قبيل
محال فى الدنيا عاقل تلقى خِلو هبيل
ماتغشك مناظر منضمه وتتبيل
حتى الجليد مرات بيبقى جبيل

القدح المرق فى وكتو لى المحتاجو
ابدا مو مهم نوع إنتبخ فى صاجو
قول لى القبيل بى جزرتن بتناجو
صاح الفيل كبير علا الربح فى عاجو

ابدا مو نبذ هدمك يكون قرقاب
الراجل كسوتو السمحه فى الآداب
الاسد البريع الكُل سهول وهضاب
فى الاخر كديس عقلو الأكل ياداب

ورتنا السنين الفايته عِبر ؤدروس
غربلنا النجيض لامن نفينا الروس
الحيا والعفاف عند الكتير مغروس
ماشفنالنا عِرضا بى السلاح محروس

الكل فى الحياه عندو وجهه بدوره
ترتاح القلوب كان ترضى بى مقدوره
الفارت على سافل الكِحَيله قدوره
بهلك هجرها وفتن الرجال فى سدوره

سافَر بى الشرق ناسا بشاش و فوارِس
سِمحت سالفتُن مصدر بحوث لى الدارِس
الشايُن مع الوِلدَن تلاته سبارس
يات اليبقى لى عِرض القبايل حارس

امانه آلغرب مافيك فرح لى القاصِد
ألبل واللِجم درقه ومطامر حاصِد
القدح القطيعتو بتلوى سن الفاصِد
والعقل البحلِّل كل ماضى وراصِد

ياسحر الجنوب فى كل فضيله مميّز
دافق خيرو لى كل إتجاه ما تحيّز
عوم الوِز هناك من طبعه مابتويّز
نضيف باطنُن غيره وحسد ماتغيّز

الوسط الملان من كل ناحية شكره
لمّاهن جميع مهره وخفيفه وبكره
فرسانا بفكو القاله عوك من وكره
نقعت نيتُن من كل شايبه وعكره

آيات الجمال فيك يالشمال تتأوّل
الدين والشتا دخلنبك انت الاوّل
المِحن المنهن جبل الرويس بتحوّل
بسادروهن ضحا وقصو البدور إطوّل

الكل شن سماهن حره جابلو قِيام
بتقلّع سحابا فى بدايتو خيام
بتعارضلو نسما ؤرحمو إبقه زيام
يات اليابسه تليّن وحي يهيجبو هيام

بلدا إجينا خبرو وغير نشوفو بَرانا
نريكم مانراهو وداك نجملو تَرانا
الشختت بروقه وفاح دعاشه قَرانا
زي قلم السغير برّاي غرامنا بَرانا

نشتاق لى الدعاش زي ما النعم تشتاق
ناباهو المحل كان لى الخلق فرتاق
المِرح الجِروسن كاتله والفرطاق
كم جاردات موارد ؤعايٍدن جرتاق