الليلة العرب
الليله العرب من المدامر قامو
دايرين الرحيل من البرق ما نامو
عقيدن حوش النوق الدبس قدامو
دارع البازه والهاري السنين لي قيامو
ستات البوادي البرقن حيرانن
ركبو مسفلين فوق الربد ديرانن
ستات الحيا الما زاعلن جيرانن
ختن غادي في الصي البعيد فرقانن
أهل الماصع الطارد الجمال ومهجر
اهل السيده فارس وللبسوقه محجر
اهل الساكنه بيت العز وفوقه مكجر
شالو وختو في البلد السحابو اتفجر
القامو الصباح فدرو الخلوف فوق كيرن
قالبين السروج فوق الحواري صريرن
بي المتنشلات من الهياج وهديرن
عاقرين جيهة السحب البدودي كريرن
الشالوله فوق شوح الجمال بتضرع
نادله جروسه فوق ضهرو وحريرو مدرع
نوقن هد في التبره الغزيره وشرع
حلبو ام ميله للدعجا الوضيبه مبرع
العرب الشرابن من ضروع وحليب
سقاوهن مدرع فوق ضهور النيب
ما حبسو الزراعه وختو ليها قريب
دفرو ام ميله في القش السماحو عجيب
عربا ختو في الحدب المقامو صفاري
فوقن كجر السحب البروقو سواري
جفو ورفعو البيت الكبير وعشاري
فوقو معقل الزمل العزاز وحواري
أم توبا مبلم في البيوت وسحيه
ما بتابي الضيوف بت البكفي الميه
الفي وشها اخوانه وخريف وسعيه
قاطعين ردة الحي بالخلا اب واحيه
الحدب اب مقاما قش وفي القمبار
نزلو الفيهن الرحمه وبعزو الجار
الداير السفر ما علبولو النار
حلبولو اللقايح في المراح وابكار
