أريدك كيف
اريدك كيف
اريدك كيف وبيتكم انتو سابع دور
وريحة كلبكم ريف دور
أريدك كيف
انحن البيتنا جمب الخور
وبيتنا الديما قاطع نور
ملاحنا الفول كمان بنحلي بالعجور
اريدك كيف
يا زينة بنات الحور
انحن حياتنا مختلفة
وقتين تقعدوا في الصفرة
وكل واحد حداو صحنو
عجب والله ورانا الزمن محنو
فرق شعب في وطنو
دا ما الخلي الحسن هاج
فوق أخوه وطعنو
أريدك كيف وانتو بتاكلو بالشوكة
تغازلو اللحمة في السرويس
تهبشوا صلطة المايونيز
وطبعاً دا كلو بالشوكة
أريدك كيف
ونحن ملاحنا مفروكة
وبنعجنه كسري بي ويكة
هنديك يمه بت الزين
تعوس الكسري في الدوكة
وتزيد خمار عجينة دقيق
وتقولنا كسري مبروكة
دقيقة زواره في الشيخة
هديــــــــــكه بهايمه مفكوكة
بتعوس يمه عقب
لا تكل ولا بتمل تضاري دموعه
بشوقه وقت الصاج يحر يسخن
تهديهو يمه بروقه
وتجيب معراكتها وتمسح
وتطعن فوقه طايوقه
طبق الكسري يتندل
تضاريو يمه بتوبه
عشان أحمد وقت يقطع
بجز الكسري من فوقة
ويابا الجاي من شغلو
وعارف الشاري سبلوكة
بتسمع فوق سكاتو انين
تحس في حلقو ديك العبرة مخنوقة
يشيل احمد يعاين ليهو
تكنو بيشك في يوم باكر
ويجر سبلوكتو بروقة
ويصلي صلاتو ويستغفر
تروح العبرة مفكوكة
يصيح ليمه بت الزين
: هياااا ست البنات بسرااااع
بطنا مطقطقة عروقها
ونقعد في البنابر ديك
بطنا الخاويه بجوعا
نبلع لقماً تحلف تقول
ضفدع متلب جو بالوعة
بنبلع ومافي زول بمدغ
سخانة الويكه والجوعة
والايد ماشه مرفوعة
و ويكة سايلة لكوعا
نقوم من الاكل شله
وجماعة وما اظن شبعو
هديــــــكه بيكابسو في الحله
لكن ماهي كسري بي مويه
من الزير أو القلة بنفرقة تمله بستله
وهو انحن ملاحنا دا بنسمي ملاح
أريدك كيف وانتو ملاحكم التفاح
يمين باباكي لو شافني
ببلع في لقمة بلع صاح
يحلف يقو جد دا ما زول دا تمساح
انحن خشمنا وقتين ينفتح
تحلفي تقولي بس
يتمزع ما بتمزع طق..طق..طرق
بصل الاضان ممكن كمان يدخل ضلع
أريدك كيف
وانا كراعي التقول مكوه وقت احلم
بحلم بأوقات في الغالب تكون بلوة
أريدك كيف
وكيف يتحب زول فطموهو بالقهوة
وكيف يتحب زول فطموهو بالقهوة
