مسيدير الآيس
زمناً منو يا ستَّأر … خطير بالمَرَّة
فيهو قلوبنا ضاقت -يا لطيف- الزرَّة
الآيس تقول شيطان طلع من جرة
قالوا هجومو أخطر من قنابل الذَّرة
دا يسَوْ فيك سُوات أم العيال للضَّرة
تعرق في الشتا وتتغطى عز الحرة
من أول جِريعة …. الزول يعيد الكرة
يمشي مِقَهِّي ديمة … لسانو طالع بَرة
جانا دخيل علينا القالوا اسمو الآيس
أخطر قالوا من دوسة لساتك الهايس
إن خالط دِماكْ، بِملاكا شوم ومغايس
تصبح زي جِقيراً فَطَّسنُّو كدايس
زولو البصطفيو ما زول حشيش ومرايس
أطفالنا الصغار وشبابنا ليهو فرايس
ديمة كُراعو ثابتة علي الأبنسِ ودايس
وفي أيام بشنقل مدمنيهو فطايس
كايس
دا الخلَّانا عايشين يوت علي أعصابنا
بلا يا سادة جانا ، وبي قساوة أصابنا
دا المخوَل عقول أطفالنا شلَّ شبابنا
بيهو شربنا كاسات المغايس دابنا
الآيس خطير أعمل حسابك منو
بي نيَّة دمار سودانَّا ناس جالبِنُّو
يندَس في شرابك شان هجومو يشِنو
تصبح ليهو مدمن وزول مفرنب جنو
الآيس خطير ومعاهو ما بتتماسك
تشبع هترشات تفقد عديل احساسك
يسقيك المغايس و تب يستِّف كاسك
إن جاك الصديق تهجم عليو بي فاسك
الآيس خطير، ادمانو بشطُب راسك
اِرميك في الشقا ويكتم عليك أنفاسك
علني بلا اختشا يخَلِّيك تَدُق أجراسك
وتضوق الفلس في السوق تبيعو مداسك