درفونه
معاها عرفته إنو الحب هويه
هدتني فؤاده والروح النقيه
اريده عصارة الخود الأبيه
درفونه وازتني جنس ازيه
***
تعال ياليل وزيد نيراني هبه
وقجها نزل الدمع المخبه
ضريبة الفرقه في دنيا المحبه
جحيم للمغرم البي الشوق معبه
***
حرام يادنيا وينو زمن سروري
وليه ماتقدري إحساسي وشعوري
سألتك بالله جاوبيني وضروري
في داعي تزيدي نيراني وتجوري
***
بلا المحبوبه مالي فيكي غايه
ومتين القاها وإتبدد شقايا
كملته من النوى وألمو وبكايا
وبقيت في حاله يرثوله العمايا
***
سلام يا المن زمن جهلك فرزتك
كبرتي وفي دواخل الروح غرستك
متين القاك وتبرد نار مغستك
وحاة إسم الله مشتاق لي ونستك
***
كيف بالاهي يانبع المسره
شواني الشوق ودمعي عليكي خره
نعيم الدنيا مهما طال ودره
بلاك مابسوى لي مثقال زره
***
عليك افكاري والخافق شرايد
بقيت مان فارز الناس والفرايض
حالي البيا يازينة الخرايد
بخاف إقروهو مانشيت في الجرايد
***
بريدك وقلبي مابيعرف يلفق
اسيرك وبي حروف إسمك بخفق
مناي القاكي يام حسنن مدفق
نعيش انا وإنتي فوق بسط ينشفق
***
مناي الدنيا تتبسم وعوده
وقوافل شوقك إستقبل وفوده
بريدك ريده ماتعرفت حدوده
وحياتي بلاكي شن فايدة وجوده
***
متين القاك وطرفي تردي نورو
واهيم في روضك الزاهي وزهورو
بريدك وقلبي كيف اوصف شعرو
وجمالك إدخل الغناء في ضفورو