بت البلد
أغرب صـدفه يومي الجيت ركبت الحافله
وجــاورني الجنى الفاكرني بتــآ غافله
قالي ها ام سـماح شـايفك تقيله وجافله
قت ليه التقـــل وفيتــو فرضــآ ونافله
رضعــانه الـــرزان وارثاه مــن امــاتي
من قمت وربيت دارســه التقل يومـاتي
لي غيــر البنات حرمانه تب نظـراتي
لابســه حيـــاي توب زينت بيه حيـــاتي
جا الكمسـاري طقطق قـالي ماتديهـــو
يا السمحــه ام سماح قرشك عليك لميهو
شــن معنى الجنيه؟ خليــك انا البديهــو
خاطـــري عزيـــز علي يابنيــه لا تكسرييهو
قلتلو :
هووي اقيف ؛؛ بدفع براي القيمه
عندي خطـوط حمـر ماتقـول علي لئيمه
من تاتيت ربيت في أســره طيبه كــريمه
من ضهر الرجــال اهلي البيكــرمو ديمه
قالي :
من وين في الأهل كدي قولي لي يابنييه
قتلو بت رجــال بحمــو العــروض زنديه
مــن كــرري الصمــود عــزتنا تاريخيه
مـن اطيب بلــد فــي الحسبه ســودانيه
قالي :
لــو سمحـتي ادينــــي بس جــــوالك
إن حصـــل الفــراق ياهو البجيب اخبارك
بين كـــل البنات عدمــن تمــام امثــالك
إن فـــت ومشــيت ختيني بس فــي بالك
قتلو :
بت إصـــول وارقـــامي مــا بديـــــه
كيـــف بت الرجــال الخفــه بتسويــها؟
لودايـــر الرقــــم جيب النجـــوم دليـها
من نســل العــزاز كيـف القيم امحيــها؟
قالي :
الرقــم قوليــــه لـــي يا الــراسيـــه
سيبي العنــاد ماتبقـــي بتــآ قاســـيه
ياالحافظه القيـم حاشاك قسم ماك ناسـيه
ياترابـــال قيمنـــا البـــي مبـــادئك كاســــيه
قلتلو :
هـي البت دون حيــاء قولي شــن معناها؟
كونـو اديك رقـــم مــن المحـــال تلقهـا
ماتعـــاكس البنـــات والشيــنه تتلقـــاهـا
اتقـــل وكـــون اصــم لرويحـتي ماتبراها
قالي :
معجــب بيك جـــد مجنــون عديــل عديني
أسمعـــي للكــلام يابنيـــه لا تردينـــي
ادينــــي الرقـــم بتمنـــى لا تصدينـــي
قاصـــدك بالحـــلال عشمـان اكمل ديـني
قلتلو :
قسمتـــي في بيـــت ابـــوي برجـــاها
كيفــن بي الشـــوارع اكوســا واتلافاها
مابديــك رقــــم والفكـــره جت امحـــاها
نفسي عزيــزه جــد بالفطــره مــن مولاها
قالي :
بت رجـــــال وســـلالتك انتـــي فريـــده
كاسيـــك الأدب ميــــزاتك انتـــي عديـــده
قالـــي يلا باي يا الــراسيه فرصـــه سعيـــده
شاحـــد للكـــريم نتلاقـــى مـره جديـــده
وانا قلت :
البكـــاء والنـــواح حاشـــانا ما بنعـــــرفو
نحـــن بنات رجـــال للفــارغه ما بنجـــرفو
لوجـــات الصعـــاب لابفـــزو لا بنصـــرفو
فارقني ورحــل ودموعــو قشطت طرفــو