ما تنعسي
عمر محمد نور
الوكِت داك
كانت المرجيحه
من سعف المطايبه
والظنون كان لسّه ما كبرت
ولا قشّ الزعل
قام صوتو فارع
الوكت داك
كنتَ اكبر من ملامحي الهسّي دي
وما كنت تخلعني البدايات
بي سماحتا
كنتَ عامل زي نَصِب تذكاري
تعرفني البيوت
الراسخه في علم الطفوله
وديمه تجهلني الشوارع
الوكت داك
كنتِ فكرة على دفاتر شعري
بس كنت القصيدة
البيها سافرتْ الركايب
في المجازات والكُنى
وكنتِ الغموض المخفي
بي شمع الحنين
يا من تركتِك
خلف ذاك التّل
ترتّبي في غيابي النيل
وغابات السُنط
ما تنعسي
الباقيلنا من نفس الصباحات
حبّه بس
ما تنعسي