ما شالني شك

ما شالني شك
إنو الوداعة الفيك شرك
الضحكة والهرجي الكتير
كان معترك ساحة كضب
لي ساسة ختوك في المحك
الشوق هلك
قلب المهاجرين الزمان
ريدهم سلك درب الرحيل
فاتوك وخلوك منهمك
في ليل طويل
ما طل صبحو ولا ترك
دمعة فراق تبكيني
إن دمي انسفك
سفراً بلا عينيك لهيب
أسفل درك
ما أحقرك
يا شنطة ما شالت بلد جواها
فاتت دون تحس بي وجعة الناس الهناك
ضمت هدوم زولاً ترك
عينين حبيبة وبيت كبير
سفر الحبيب دكاهو دك
بالله يا طير الخريف
ريدي المعاك ما بشرك
إنو السفر لعبة حريف
فاهم دروب الرجعة ليك
ما بتوهك
ما كلمك انو البفوتك بالجسد
روحو بتحلق ما بترك
ما فهمك يا قلبي إنو بلا الدموع
سفر العيون باطل عديل
إتوضأ في نيل علمك
وين ما مشيت
ياني البضمك بي صدق
وإن يوم قسيت وهجرتني
قلبي المعاك ما بهجرك