أدعي معاي يفضى التنكر
آسف يا عمري ومعليش
عارف قصرت معاك جدا
بي غيبة أمبارح كم ساعة
وحياتك كان كلها تفتيش
ولامن دقيتي وما سمعت
أنا واقف في صف العيش
عارفاني محال أبعد قاصد
وأنا بيك متيم ودرويش
ما تقولي قليبك بقى جاف
وأنا ريدك فيني بيتدفق
ووحاتك ظاهر وبنشاف
بس إلا بعادي بكون جبري
وما طالب غير الانصاف
ما بقدر اسيبك يوم كامل
بهتان في حقي وإجحاف
بس اليوم داك من أصبح
أنا حايم ورفقة الاف
كملنا بنوك الخرطوم
واكلتنا صفوف الصراف
ف ما تقولي علي بايع ريدك
وقليبك دون داعي يخاف
بس أدعي معاي ربنا يستر
ويغطي هوانا من العين
ويحمينا ويملانا بحبو
ويكفينا شرور الحاسدين
وانا هسي وحاتك بكتب ليك
واقف لي اكتر من ساعتين
غير اللفيتهم في الفاضي
وكايس لي محطة بنزين
والتنكر لسع مافضى
وكمية ناس ملمومين
وانا رغم الحاصل مشتاق ليك
ويا ريتك لو قلبك يلين
أنا ما فكرت اسيبك يوم
وانا ريدتك مالياني سنين
في صف العيش انا بطرك
وجنب الصراف ريدك بكبر
وصف البنزين شوقو براهو
وانا أصلي محال يوم اتنكر
وناوي أجيك الليلة ونطلع
بس ادعي معاي يفضى التنكر