يا سلام

يا سلام

لو تبقي جلسة جبنة

في طرف البحر

أو قعدة في صالون حلاقة

و قرقراب

و الصيف جهنم

و شيريا من أيد عشة

مشوار رقشة

و أمدرمان مجرتقة بالغبار

و خليل بحجي العازة

يا أم أحمد المحلب عدم

و الغاز صبح ود امبعلو

السوق تماسيح

و الشوارع كرتة

و الختيف كتر

يا وطني كيف أمسيت لعلك

ما بتشكي من القراد…؟

كيفن دروب الرجعة

فتناك وجعة

نومنا الهجعة

كل ما يتاور الجرح النتح

نطراك

و كيف النيل حِسى..؟

و بنت الجزاير فيهو

و لا الحالة زين..؟

يا يمة كيفنك

طريت الونسة

دعواتك ..

رضاك سابقني بالخير

في بلاداً قاسية

لا ضل لا ضحى

أمسيت لعلك خير أبوي..؟

كيف البيوت و الحلة

ونسات المسا

و سلام عليك يا وطني

دام الدنيا أصلاً حالا ما بين

بين و بين

و شتات و فرقة

و كآس أسى