غربة
مريودتي الحشيمه وبالأدب مفطومه
قلبي عليها ديمه وبعزره ومابلومه
نامت وباله رايق وبيا مي مهمومه
وانا سهران اقللب في العيون إلبومه
يانجم السماء الضاوي وسناك امتده
طرفي زمن مساهر والعزاب إشتده
نوم يازينة السماء والحديث ان جده
مابنفعني وزرك ياعلوق الشده
يازهري البريدك ومن عطورك فلي
مشتاقلك تعودي وفي سمايا تطلي
من لوعة فراقك وآ عزابي وزلي
بقلد طيفك ابكي وبيك اونس ضلي
بشكيلك ممحن ياغرامي واسي
من هماً يودر كاد إشيب راسي
إتنين إبتلني وجرعني مأسي
حسادي العوازل والزمان القاسي
شوقاً لي عيونا وطلته ومحياها
والبسمه البتنزر بالمطر من فاها
اربعه ياخلايق بشكي من مر داها
بعدها والمغايس والحزن والاها
طريت ايامي جمبك والليالي الغره
يابت العواهل والإصول الحره
شوقك وإبتعادك جرعني المره
والعجب العوازل والحظوظ الطره
قست الدنيا واشقاني الزمن بي بينو
ياها طباعو غدارن موالف شينو
مريودك موكر في همومو ودينو
ليهو زمن معزب وماهجد ود عينو
ماتلوميني يافرع الاراك الداني
ان قصرته اسبابي الزمان الجاني
ارجو سماحي يالحبك ملك وجداني
ايام شده بتعدي ونعود من تاني …