أبقى عافية

أخوي

أبقى عافية

مصير البتعكر تجيك راجعة صافية..

غباش في عيونك

بيخفي الحقيقة..

وكت كنت لي هالبلاد ضي طريقة..

فؤادك مضمخ بطيب النضال..

وجيت شان اوادعك واعافيك وترحل..

لقيت الحروف فيني قالن تعال..

فدون خاطري امشي

قفاك لي بلدنا

قفاك للمداين الكتير جمعتنا

قفاك لي وطن كنت غنيت عشانو

وحالة بلاد ياخي كم دمعتنا

بلاد رغم جور الزمان العليها

تظل في دواخلنا رمز الجمال..

وعارفك بترجع…

كما كل بعيد قربت امو تقنع

رحل للصحاري العماراتا تلمع

يلاحق سراب واحة من الخيال..

ملك جوة (كافوري) فيللا وحديقة

اسانسير وراحة

واسطول منمق كبير المساحة

عروس سمحة غارت عليها السماحة

ومركوب نمر عمة توتل وشال..

…………

مصيرك حترجع

حترجع تلاقي البريدك .. بريدك..

بس الا البعاد بيطفي نار القلوب..

مجالس بتسكر بابيات قصيدك

وراك قررت دون قصايدك تتوب..

وحوش البيوت العشم بي جديدك

مزين بخيط عنكبوتا كئيب..

شوارع تجيد في مشيها وتجيدك

ترحبك اهلا..

حباب الغريب..

ضهر أمك الكم تكيت فوقو ايدك

حناهو الزمان دون وجودك ومال..

فايه لازمة انك ترسل رسايل

وشوقك يوصف عناك الطويل..

تبيت ليلك الدمع في الخد سايل

وتصبح دموعك تحيي الكفيل..

وقايل قروشك بتنفعنا قايل؟؟

وفيها بنشم ريحة انك ذليل؟؟!!!!

وحالك اخوي يغني عن السؤال..

بتتذكر انك زمان قلت لي

الوطن كلو حقك بس الا المطار؟

زمن جيتك اشكي الظروف الصعيبة

التستف شنط غربة من الحصار

فردت الشنط فيني بي كل عزيمة

وفرتقت في لحظتين القرار

فما كنت قايل بتملاهن انت

وتغافل مبادئك تهاجر شمال..

فشكرا لأنك بهمك خبرنا

وشكرا لأنك طريت اللي كان

وشكرا هدمت الفضل من صبرنا

وشكرا لأنك خسرت الرهان

شجاعين وراك كل كسر فيك جبرنا

وشجاع في قرار الهروب الجبان..

فلا تقول لي يوم الوطن كيف ظروفو

ونيلو الجميل المرادك تطوفو

وطاري النسايم…

سجيع الحمايم..

وريحة ترابو ونخيلو وجروفو..

وقت اصلو فارق معاك يا الحبيب ;

تعال هسي شوفو…….!

واقلد النخيل الصبر في الرمال..

ولا تقول لي معدن محال انو يصدأ

ولا عندي غاية ومفاهيم ومبدأ

وطن أعلى من كل هذه الجدال..

اعيد ليك وصاياك لي بي قفاك؟

بلادك حداك..

بلادك تكونك …. شوف لو تكونا ..

اذا البعد طال..

فسافر براك

وتأكد حيحصل واسافر وراك

وأحب (الحكونا)

واموت في الريال..