قسمة و نصيب

زولتنا كانت سمحه جد
في عيونا كان الليل لبد
و في رموشها كان القيف شرد
و في الضحكه بصب البرد
و لكل سؤال
كان للجمال في عيونا رد
و زولنا كان بريدا جد
في ريدا ما كان ليها حد
و القصه عارفها البلد

بلقها لو يوم قام فج
ر في ونسه في شاي العصر
جنب بيتا لو حايم كدر
و دايما حديثهم في العرس
وكيف يلملمولو قرش قرش
و كيف يبنو من ساسو التحت
لمن يودهو العرش

و كانو عايشين في غرام
لافيهو خداع لافيه غش
لا فيه كرامه بتنخدش
وتمر سنين بكل حنين
لا فيها الم لا فيها انين

و زولتنا كان حافظا الوعد
و لزولنا تب ما تغيرت
لا من قريب لا من بعيد
وياهو البحصل يا اهل
لو كان صحيح الزول بريد

و صاحبنا بلم في المهر
بالرغم من دخلو البسيط
200 جنيه اخر الشهر
فيها الاكل و فيها اللبس
و فيها العالج فيها الوفر
و شان كنتي يالسمحه الامل
لا كدة لا ضاق بيهو فتر
بالرغم من حالو الصعب
و بالرغم من دخلو الكعب

بالرغم من تعبو الشديد
شان كان صحيح الريده في دم الوريد
بس بالزمن السمحه يوم اتغيرت
و يما الزمن ياكل الحديد

السمحه ليه اتبدلت لزول تعب
و نست الحنان في القلب
و السمحه ليه اتغيرت لي زول بحب
و القصه ما كانت كضب
زولتنا جاها مغترب

السمحه جاها مغترب
زولتنا يوم الوافقت
صاحبنا في المقلب شرب

و كان العذر
اصلو العرس قسمه و نصيب
صاح يا اهل
اصلو العرس قسمه و نصيب

بس يا اهل
وين قسمه الخاضو الحرب
طول عمرهم
لا اتغيرو لاحدو يوم من الدرب
و ين الحنان و ين المشاعر الفي القلب

باعوه بكوم الشنط
باعوه بالجزم ام سست
باعوه بالكمين جنيه
و الكم شبط و الكم جنيه
القالو لي قطع الرحط
باعوه بصفقة بنات
زغريد حريم وعلب كريم

و أدوك للبقدر يجيب
و قالوا العرس قسمة و نصيب

و لو عارفه يا زينة البنات
دقو الجرس باعوك في سوق الرقيق
ودوك في اخطر طريق
من دون رفيق من دون حبيب
ادوك للبقدر بجيب

و قالوا العرس قسمة و نصيب

و لو عارفه يا زينة البنات
غشوك بي صوان كبير
و عريس كمان في البدلة
عامل زي عوير

و البنسون اب عشرين كمان
ولعه فيها صمام امان
و كدوس عجيب دخانو بطلع بالاضان

و بنات عدد صفق الشجر
و السيرة كان لا ليها راس
لا ليها قعر و فنان يلعلع للفجر

و تطلبي شئ البيت قريب
و التكسي بودي و يجيب
و قالوا العرس قسمه و نصيب
و قالوا العرس قسمه و نصيب