في بت شفافة
ريم الرفاعي
في بت شفافة
عيونا براءة
بتزرع قلب الصحرا جناين
بين جنبيها مداين رقة
وتأسر روحك لما تعاين!
تتسرب مابين انفاسك
وتملأ حواسك حد الريدة
تأسر روحك دون ماتقصد
دون ماحتي تلامسك ايدا
حلوة حروفا المارقة تتاتي
ودهشتا بي كل كلمة جديدة!
ولما تكون المفردة اصعب
تشرح حيرتا بي تنهيدة
دي البي موية الحِن معجونة
وحلوة عيونا وسمحة خصالا
ترفع ايدا عليك بي لهفة !!
اذا المشوار لي بيت ناس خالا…
كل الناس بتحب طلاتا
بننسي الهم لو طل جمالا
من البحر الاحمر شالت ..
عمق احساسا وبرضو دلالا….
ومن صدفاتو بياض اسنانا
ومن صوت موجو هداوة بالا
بين اوردتي مكانا ودايماً
في جواي عشم موالا
حصناها من الماسمي …
ومن كل دمعة حزن شريدة …
وغطيناها من الماصلى…
وقال يارب في الصحة تزيدا …
وسميناها رغد احلامنا …
وكان البهجة مواسم عيدا
هي بت..
شفافة..
بتزرع قلب الصحراء جناين