المطرة
المَطره..
هَبّت..
والسَماء إنزردت تَعبّت
اُمي تبّت
دخّلت باقى المراتِب
شويتين والمَطره صَبّت
كُل سَباليق البيوت فى الحِلّه كبّت
الكهارب فجأه خبّت
صِحيَت أمباتنا القديمه
نارها شبّت…
عم محمد يا الطماطِم
الخَدار يادوب براعِم
عَبّ بطاريتو فازِع
والسحاب بي باقي نَضمو
طِين محل مالاقى شارِع
طابق المركوب في باطو
وايدو نورو وايد عَصاتو
الطجارب يا الطجارب
الخدار غرقان وشارِب
كف فى كف بي ايدو ضارِب
موسمو ميّت
يبقى موسمو الجاي كارِب
الله غالب…
حاجّه عشه اجُر وعافيه
قالوا اُمبارح وقعتي
خير سلامتك جات خفيفه
تسلم آيابا اليعافيك
قُمت لم المطره وِقفت
قُت اشوف غنمايتي صِبحت
الحويش واطاتو شِينه
ماهو رمله تُرابتو طِينه
غايتو كان ما الله شاف لي
كُت كسر بالميّت إيدي
الا قدّر جات سليمه
والغنيمايه الغشيمه
حبّه ما حصلت عليها
اصبحت مَرقت رعيها…
التِرلات الكوّارو
حايمه فينا تجي وتفوت
نقنقة مطر الخريف
قددت راس البيوت
الجراكين والجرادل
حبل طالع وحبل نازِل
الجُهال مرقوا الشوارع
يبنوا من الرمله جامِع
الزرايب للبهايم
الحُجار فى شكل ضان
ياتو فينا بهايمو اكتر
وياتو مِرحاتو السُمان…
لوري حامد برّه ينبح
واقف لَساتكو موحِلات
شاحن لي شوّالات فَحم
والحِله كُلها برّه جات
لِزّك تلِز لِزّك تلِز والناس تنِز
الحِيلو في والحيلو مات
والجَهله مجاااني الفِلم
كان بي مُرادهم مايتم
اللوري ينبح للصباح
وحامِد يخيّب ظنهم
اللوري ينفك واستراح
سوّاق هو صاح
وسواقتو مي سُواقة نُصاح
لفّ البلودات والبِطاح
لا يوم ضِهب لا مرّه راح…
المَطره جات المطره جات
قِبليه مِن تال الشرق
بيت الغفير اللي وراء
إتعبّى بالمُويه وغِرق
شان بيتو طِين
على دا الوضع واقف سِنين
مرّن عليهو كمّين خريف
البيت مؤكد مابيقيف
وعم الغفير ما مِن هنا
جايينا ضِيف
ادوهو بيت
شغّال وحارس المَدرسه
بمشي وبِبيت
شال ليهو عصا
فَرده ولِحاف
راديهو والليل مابيخاف
صِبحت غِشى الجَزُر القريب
بصلات طماطم وكوم لحم
فى بيتو زيتو وفى الفحم
شال الرغيف
طيّب خفيف
ظبّط مُلاحو وكَب فطر
راديهو شغال بالحَجر
خت راسو نعسان من سَهر
خت راسو فى بالو المطر
اتلملمت فوقو السماء
قُبّال تمغرب ضلمت
والشُوف عَمى
تِحتو المحطّات شوّشت
والرادي شَخره وهمهمه
تِقل السحاب
إنقد فى راسو وهَمى
الحِله مافضّل نفر
الأعمى شايل الإنكسر
شالوهو فردتو واللِحاف
وعصاتو راديهو الحَجر
شالوهو مارقين مِن سُكات
عم الغفير بالمُويه مات…
يا مِطيره صُبّي لينا فى عينينا
يا مِطيره ذكرينا لو نِسينا
يا مِطيره نحن لسه علمينا
يعنى إيه يا مطره طُوبه
يعنى إيه يا مطره طِينه
يا مِطيره يا مِطيره!