اتعلمنا من أبواتنا
إتعلمنا من أبـواتنا قول وحقيقه
قالولنا الرفيق هو البسندك في الضيقه
قالولنا الوليه ضعيفه أوعه نعيقه
والخير نعمه والشر بي صراحه حريقه
إتعلمنا من أبـواتنا كيف بنصلي
وحسنا للكبار منعونا ليهو نعلي
قالولنا البباري الفارغه منو نولي
والبهبشنا في الدين وقتي راسو ندلي
إتعلمنا من أبواتنا صلة أرحامنا
والصلاه قالو بتخلي النفوس مطامنه
هم ورونا كيفن نرضي بي أقسامنا
وكيفن برضو نختار البناسب أحجامنا
إتعلمنا من أبواتنا ليه بنذكي
وبي سيرة الرسول قالولنا املو التنكي
أي نصيحه مره نتاجه قاطع شكي
شان نتجنب اليوم السمومو تبكي
إتعلمنا من أبواتنا فضل الصوم
والغفلات تجيبلنا مره مره اللوم
ورونا المعايش ما بتجيك بالنوم
والبحر أصلو بختار البعرفو العوم
إتعلمنا من أبـواتنا معني الخوه
والبتعدا حد المولي بقع الهوه
الضيف قالو ينخت في العيوينات جوه
والبستر عروض أخوانو فيهو مروه
إتعلمنا من أبـواتنا عمل الخير
واتعودنا للمحتاج ندق الشير
الصاح قالو دايما” شاركو بيهو الغير
والأرزاق مقسمه للبشر والطير
إتعلمنا من أبـواتنا حب الناس
والداير الأجر نص ليلو يصبح حاس
ورونا العلم ما إلا بالكراس
ومدارس الدنيا بالجد خرجت فراس
إتعلمنا من أبـواتنا نحفظ دارنا
وزادنا نقسمو نكرم بيهو ضيفان جارنا
إتعلمنا كيف نخدم عدونا إن زارنا
وكيفن منو يا الأخوان بناخد تارنا
إتعلمنا من أبـواتنا حاجه مفيده
الصلاه للرسول في لسانه صار ترديده
بيها صبحنا عايشين في سعاده شديده
وبيها مرقنا من كترت بلاوي عديده