قلت ليها

قلت ليها :
دخلتي حياتي فوق كل البنات توَّجتك
عشت معاك ، لي زول أصلي ما حوَّجتك
أنا المارضني فوق كل البنات فوجتك
واتمنيت تكوني معاي وما اتزوجتك

هي قالت لي: الزواج أقسام وماني قسمتك
أنا مجبورة يا سيد روحي ما تقول خنتك
صاح بيناتنا وعد زواج و ما اتزوجتك
بس يا سيدي ما بنساك مدام ردتك

قلت ليها : انتي ما غلطانة
عشان في يوم تجي و تعتذري
وعارفك إنتي ما بتقصدي قلبي تكسري
أنا كل ما أتذكر الريدة معاك البدري
نص الليل بشغل أغاني ود النصري

أكيد مجبورة عشان جبروك على ود خالك
تلاتة ليالي عدَّن وما عرفنا أحوالك
كان قالولي خير أهلك وقعدوا رجالك
بلملك القروش الحايمة جت سد مالك

عقدوا الشورة قالوا لي فلان عقدولك
بترحلي تاني ما بتجينا أظن لاحولك؟
أنا المارضني يا الوجع البتقتلي زولك
أتعب في زراعتك و هو البشيل محصولك

أهلك غلطوا في حد الغلط و اللوم
ماهن عارفين عيني غيرك ما بتنوم؟
أنا المارضني منك غير جرح مسموم
يطردوا المتلي و يدوك لي جنى الخرتوم

كان دايرين قروش بدفع قروش بالكوم
وكان دايرين نسب أنا ود عزاز القوم
أبوك القالوا ما يشوفني فوقو يحوم
أريتو ان شاء الله بي دابي الخلا المسموم

أخوك يوم جيت دايرك جاب معاهو كلاش
يحمر عينو فيّ لامن يجيبلو طشاش
أنا المارضني يا شتلة جناين القاش
أخوكي طردني ساكت.. لا حديث لا نقاش