يا أم كحل

إنْحَلَّ آام كُحُلْ بعد النَّشَاف كَرَّابِكْ
وجاكي الفَرَّحِكْ مِن هَمْبَريبو شَرَابِك
يا القَلَبَنْ رَشَايْمِك وَدَّرَنُّو سَرَابِك
ويا الزَّرْقَن سَمَاكي الليله عِيدي شَبابِك
شَمِّكْ هاجَرَتْ وَهَج السَّمايِم سابِك
ويا البَدَّرْ خريفِك وما انْكَشَفْ دَرَتابِك
ما جَفَّنْ غدايرِك وما انَّفَضْ وَرَتابِك
ويا الغابَنْ مُحولِك والفَتَقْ تيرابِك
يا الكَسَرَنْ مَرَانْعِك وانْسَرَف دودابِك
سَمَاحِك سَمَّحو الرَّعَد البِكُر في سحابِك
ليلِك جَمَّلو البَرْق البِفِج دَهَرَابِك
والسَّاري البِسوق سَوَّاكي دَرْب وسَرَابِك
النَّعْ البِشيل ليلو ونِهارو سَخابِك
وناغوشِك نَتَرْ دَعَتاً بِنِفْ ودَوَابِك
فَجَغيب كَرِّك آ ام بوح البِجِضْ مُتْلابِك
ومن عَصْراً كبير كَبَروسو بانْ حَلاَّبِك
سَمَاح البَرْقَه بِتْهاب النَّدَي الما بهابِك
وسَمْحات زراف ريره اللِّقَن مُضْرَابِك
ياحليل فَرَّتِك والسَّرْحَه فوق هَبَّابِك
وقَفِّكْ فوقو حاروك النَّعَمْ مِتْشابِك
بَيَاضِكْ ودَمْبَلابِكْ والسِّحَا ووَرَتَابِك
وحَنْتوتِك مِفَرِّشْ فوق دَروكي وشابِك
قَفَلِكْ وانْدِرَابِكْ والبِنُو ومَعَرَابِك
والكِتِرْ المِجَرْجِخ والسَّعات واطْيابِك
شَدَرِك عارْشُو شَعَلوباً قَطَعْ رَارَابِك
وفَرْعِكْ لولَحو الزِّيف العَقَب كَرْكابِك
سَمَاحِك في سَمَاحْ زولاً بِرُدْ تِرْحابِك
ويا ام كُحُل السَّمَاح ناساً بقولو حَبَابك