يا فاشر الصمود
بنيتي … عسلاي
تعالي لي جاي
بشقنا البكا
وقعدة الحراي
عيالنا ماتوا جت
لكن ما ماتوا ساي
دميت أمس دوشكاي
قليبي فر جاي
يا الله ان شاء الله خير
و حلبت لي غنماي
أم شري و حسكنيت
نحس في حشاي
شري و حسكنيت
نحسو في حشاي
يا الله ان شاء الله خير
يا قلبي قنب ساي
و مشيت نجيب حطيب
قشاية فوق قشاي
شري و حسكنيت
نحسها في قفاي
يا الله يا الله
ان شاء الله خير
يا قلبي قنب ساي
أوقدت لي نار
ختيتو في اللداي
وقعدنا كل ست
عيال بشربوا شاي
هارون وليد إسحاق
عيساي و أبكراي
ماشين كلام زرع
و جابهم الدالاي
سلام سلام مرحب
يا ناس تعالو جاي
سلام سلام قعدوا
هزيتو كفتيراي
سليقة تشربوا ؟
قالوا جيبي جاي
ضحكنا والله ست
شربنا لينا شاي
و قعدنا شيه كي
غراب قطع بي جاي
ايييه… ريشه أزرق
و راسه كندماي
و أنا قلبي فرّ شووو
يا قلبي قنب ساي
و الدانة إلا دَووووووو
و الطلقة في حشاي
يخوانا شن نسوي ؟
نطيروا بالمعاي !
يا الله شن نسوي
نطيروا بالمعاي
وليد وقع كَرَووو
ولي يهو إزاي
تكين عجيلو بوو
و الكاتلو خيبيو
قبال ما تكتلو..
خليهو يشربوا شاي!
هارون وليد إسحاق
قول لي متين أذاك؟
ساكت كتلتو ساي !
و عيساي و أبكراي
و آدم الشركاي
في عينيهم الهبوت
في قلبهم شتاي
أنا شفتو كلّ مات
فرشتو مصلاي
ركعتين ضحى
الفاتحة و الضحى
و الكاتلو ما استحى
سندتو بي قفاي
و الطلقة شاري شووو
خليهو يصلي ساي
عيشة سمبلة..
ميتة سمبلاي ؟
دبابة و قنبلة
يحرقو سنبلاي
أريتنا بالبلاء
نموتوا في الخلاء
قبرنا طنطباي
أريتكو بالبلاء
تموتوا في الخلاء
قبركو طنطباي
يا فاشر الصلاة
الكعبة نصلها
و الريحة صندلاي
شهيد ورا شهيد
نجرو سلسلها
نشربوا إيد بإيد
و الأمن كوثراي
يا فاشر الصمود
يا موطن الجدود
الحي أكيد بعود
يا أرضي يا سماي