وقفت في باب الحلم
ووقفت في باب الحلم ناديت عيون النوم تفيق
تنفض نعاسا تثاؤبا وتفتح علي الفجر الرقيق
شباك وبابين اشتياق لي موجة في بحر الرفيق
ونسة عصافير الصباح لمن يجابد الريح شهيق
حبة طمأنينة وسماح ساعة يخوّنك الصديق
طاقة وصول لي الضفة حين يصعب عليك تبلو ريق
النوم اخير من تصحي مخنوق بيك وجلدك عن احاسيسك بيضيق
وانا لسه بين حلمي وصحاي في لجة الخوف والأمان
درويشة في حلقات فراغ لميت مجاذيب الحنان
انا والاحاسيس والشعور ..والآه والدمعة وفلان
غناينا اغبش منكسر ..مليان كلام مقطوع لسان
خطينا دستور الفراق..ادب الوداع للناس بيان
ممكن نفارق بي احترام لي ذاتنا لي العشناه كان
ممكن نفارق زي طلوع العطر من رئة المكان
دون ادني تجريح او اذية ودون ملاعنة وامتهان
نطرانا بالخير للبيسأل بينا وينو الافتتان
ونطرانا بالخير حين يحرك فينا شوقنا وتر كمان
نحفظ امام الذكريات ماء وجه ايامنا الزمان
الماشي ماشرطاً يحرِّق كل حصون الروح وراو
يخرب تفاصيل الاماكن الكنت فيها ف يوم معاو
يفتح دهاليز المواجع اغنيات فرحو وشقاو
ممكن نفارق بي سماحة ويفضل البيناتنا زين
نتلاقى ساي ..زي اي اتنين كانو (ما) يوم عاشقين
نضحك نطايب الناس وماليانا المواجع والحنين
مالضحكة بس فرة شفايف حتي لو جواك حزين
نتلاقي زي ما الذكريات مرات تداهمك بي السنين
يتبسم الريد الجواي بالفرقة راضي ومستكين
ووقفت في باب الحلم….