في مراسم إستقبال حبيبة
في مراسم استقبال حبيبة وكون فسيح
انشداه… الجو مسلط
الصباح … أول خريف
السحايب سابحة كانت ستة ستة
والمطر مرات يصب مرات يقيف
والشمس تظهر وتلبد
الغمامات ما نصاح
الشعاعات حته حتة
والنسايم يا لطيف
والمهم في القصة انو
وباختصار ما دون لأنو
وحيث انو وكيف كأنو
وبعد منو ….حقو اصحي
قلت اصحي الجو ظريف
جو حبيبة وضل وقهوة
جنزبيلة اتوضي نكهة
وصلي فينا وتمم الكيف
كان في وردة
في وش مندي
كان في نسمة
شراع معدي
وكان في رملة
حاضنة قيف
والفراشات حيامة فوقنا
كما تريد
عاملة كيف كيف
لونة اجمل لون (ملون)
وصادف انو الشوف نضيف
ما الجو خفيف
وكل ما الجو زاد سماحتو
وكل ما الهواء زاد حفيف
كل ما الشوق زاد حريف
فالتقينا………………….
التقينا وكان عصاري
في مساحات شاسعة جدا
هادية زي صوت القماري
كنا قاعدين شكل مافي
كانا واقفين اطراري
كنا حايمن في صفاتنا
قلت ليها…
سمحة عينك فايته جدا
ظبية من تلك البراري
وهي بتقول لي…
وانت كاكاوي الملامح
انت محبوبي البضاري
كنت بتجول صفاته
كنت ماشي الاقلبي جاري
والتقينا………………..
والتقينا في ليلة خضرة
عامرة حاجات حلوة مَرةْ
ومَرةْ … مُرة
كان في نوبة
كان في حضرة
كان في ليل
كان في سترة
ومرو غيمات كانو ندرة
ونسمة مرت شايلة خمرة
ونحن سكرانين بعضنا
سكرة ما دون أي خمرة
شوق وريدة
محبة فايضة
فايضة دفاقة وعندية
محبة زي ماتقول شديدة
مخيفة خَطرة
المهم قالت كليمة
طالعة سكر من خشيمة
زي بحبك او بريدك
ولا بس احساس وصل
المهم نضحت عسل
وقبلي تطلع ولي تصل
قلبي نملاتو الفقاري
كانو عارفين الحصل
وعيني كان بي ايد بتمسح
وايد تداعب في الخصل
وفجأة…………فجأة
بعضي من كلي انفصل
هو شنو الحصل
السما الصافي الممدد
ضووء فيو مليون نجيمة
والبحر كان لونو فضي
القمر اداهو نورو
خجلن الموجات وراقن
لما ظهرت فيهو شيمة
وفي ضهر مركب مقرش
كان في رادي ..
صوتو وشوش
وجاب نغيمة
وغنا فنانا المفضل
غنا بي صوتو الرخيم
مين بلاقي حبيبو ضلمة
غير مساهر ليلو ديمة
غنا لما القمري صفق
وصفق الشجر الحميم
وفرا أسمح ضل علينا
فرا فينا ولينا فضل
والورود غنت معانا
والعبير فاح من عبيرو
عبي طبلو ولينا طبل
لي وليها
لي الحبيبة البرتكانة
لونة انضف من نوايا
ملايكة الله وريدا انبل
يا سلام و الله عليها
كل حاجة جميلة كانت
واي حاجة جميلة فيها
يا لو اللحظات بتفضل
قلت ليها… .
يا حبيبة اقعدي حبة
الفراق ما آن اوانو
والورود ما حقو تذبل
والمحنة فرض سقاية
و العطش شوق بس معطل
الدراويش لسة ما جو
الحكاوي حتبقي اجمل
وشوقي يا ريدي المغادر
شوقي ياخ اللسة ما انبل
يا حبيبة يا تقعدي
يا تجاوبي
في غيابك ايه حنعمل
وهو البيحصل في غيابك
ما بيحصل
يا حبيبة كيف نبدو
كيف نبدو يا حبيبة وما هو الحل