وكت الصيف حكر

قول لي محُمّد البِلْ بهدَلَنْ بي شايبو
ولَفَح الكور علي شوشة البِصَرِّج نايبو
بنات الادْرَع الشُّمّارتو فاصله حقايبو
ما يغُشّنّكْ الريدهِن نتاج مو جايبو

يا جادالله بي الفَنْقات رُقادَك سيبو
وسوق البل محاجين المِسَتّي وضيبو
كَفَلْ الفي البهايم تيرهولو حليبو
ابَتْ حاروقه دارو ونحنَ بنلاهيبو

وكْت الصيف حَكَرْ قام السحاب واترادي
شِرْبَتْ في ام سعون ما اتْعَنّتْ ام كَدّاده
أُم رِقّاً علي النّدّاه حَبَكْ واتنادي
حِسْ قِرْقيطها بِخَلِفْ دُلّقْ الفَدّاده

سَعَدان الزِّرَدْ يا ام قُجّه ابيتي رتوعو
دايره مَقَايِلْ العَشّاشو حَنّي فروعو
البَهَمْ الجَدَع مَفْروعو فوق مَرْدوعو
دُرْنا نتوقو فوق الخازي فَجّاج كوعو