طلقة

(طَلْقَة مِن رُشاش) الزِّيفَه فوقنا تصَوّي
دايرين ينعِم السَّافِل مشاتي الحَوِّي
أهَلْها يعَلِّقو الدَّقْما ام حديداً قَوّي
يجيبو رسانة ابو قرون الدِّقاق مِتْلوّي

الشاعر : طه الازرق ودالسِّراج الحامدابي

(طَلْقَة من رُشاش) لامن سنابَك قام
وغاربَك فوقو دُقْن الطّافه من قِدّام
إضْليم حَمْرَكولا الما معاهُ نعام
زايِع وفَزْ وخايف ورَفَّعْ العَوَّام

الشاعر : علي ود قدّال السراجابي

(طَلْقَة من دَرَتْ) تَرْعَي وتكِسْ بي رغامَك
وما بضَلَّنْ دوام عارِيَّه عان ها ايّامك
سِتَّات اللَّكيك ناس ام عُروض قِدّامك
فيهِن فسْحَه ليك كان ما عَصَرْتَ بهامَك

الشاعر : مُحُمَّد ود عبيد الله الهَوَّالابي

(طَلْقَة من درت) سوميتي ما ضاق تَبْني
دَفّاق دومو دَمَّاع البَكَتْ مِنْغَبْني
الحُمْ الفريقْهِنْ بي الصِّهيبات مَبْني
دَاكّو الانْرَدَمْ بِشْبَه سَحَابْ الصَّبْني

الشاعر : علي ود موسي الغِلَيَّاني