طال عياي يا اخواني زاد
والله لخير العباد
يا ربي يارب العباد
اسعدني بنيل المراد
اجفى الاهل وكل البلاد
اطوي الفيافي والبواد
اصل الرسول الفى ام زباد
وين نحن ياخوي البُعاد
من سوحو مازي السُعاد
الجاورو و نالو الوداد
شاغلانا ناس ليلي وسعاد
والدنيا حاميانا القعاد
بوصيك ونفسي لا تحيد
عن مدحوا شفّاع الوعيد
ان قالوا ليك عقب وعيد
كرر واسقى لعاشقو زيد
و غرز لحبهو في الوريد
اخلف شتم فوق الحبيب
بأمداح رسول طه المجيب
كل الفنون لشمايلو جيب
بصوتك الفخم العجيب
خلي العشوق يفني ويغيب
حرك قلوب العاشقين
وصبب دموع المايقين
خليهم دايما شايقين
خليك اكيد و علي يقين
نلت الأجر كالسابقين
يا مادحو لا تكسل تقيف
جيب مدحو فى الصيف والخريف
وكل الفصول خليك حريف
فى كل بوادى وكل ريف
اسقي العُطَاش حُب الشريف
حمّي الدفوف زامل الزميل
وطوف بالبلاد لو ألف ميل
خلى العشوق يطرب يميل
لغيرو لا يحيد لا يميل
المصطفى كاب الهميل
والله أمداح الرسول
تغنيك تمام كل عن سول
باب الرجاء وباب الوصول
بامداحه اتجول وصول
عن كل غير أنصل نصول
لا تنسى لآلو الكرام
جيب مدحهم يوت باحترام
اصحابهو العافوا الحرام
حالف يميناً ما حرام
الجنة لاعداهم حرام
صليت صلاتاً باحتراف
تملى الكيان حد السراف
عدد الدواب بغلة وزراف
تنجي العباد من إنحراف
وتكفي كنيش الإنجراف