يا وَداعَة
قوماك لِصاحِب الشَّفاعَة
النَّزورُو
الرَّاوي لِنَفسُو طاع
في وَحل الآثام ضاع
حالِفُه ما تِديهو ساعة
لِزَجرها ما استطاع
أدعوك اللهم يا مُطاع
بحق مَن نال الشَّفاعَة
أعطي لِعبدك وراعَه
وأكرِم عبدك وَداعَه
نبيّاً مَعروف بالوَداعَة
والشَّهامَة والشَّجاعَة
زاهِد الدُّنيا أم مَتاع
بان عَدلُه في الرَّضاعَة
نبيّاً أصلُه وفصلُه ثابت
مِن أجود وأطيب مَنابِت
كُل الخير مِنُّه نابِت
وعُموم الشَّر ليهو كابِت
المخصوص بالزَّعامَة
صاحِب التاج والعِمامَة
ليه الفَضل والقِوامَة
علي المخصوص والعَوام
صاحِب الخُلق النَّبيلَة
والأوصاف الجَميلَة
الأرواح ليهو تَميل
حَنَّ العود بالعَويل
يا المُكرَّم نور عَماي
سيِّد أجدادي وآباي
قولي قَرِّب لِحداي
جنبي في الدَّارين معاي
مِن روضاتو والقُبَّة
نَسيماً لَيل ليَّ هَبَّة
رَدّ الرُّوح حبّة حبّة
مَتى لِسوحو يا أحِبّة
الصَّلوات الثَّقيلَة
على المُختار الوَسيلَة
مِن ابن كنيش العليَّة
مِمّا صابو يَلقى حيلَة