شوق فاصلة وبس
طيفك بشرّك ليهو كل ما أشتهيك
وأذكرك لمن تغيب عن خاطري صورتك
ضحكتك… زعلك … سلامك … وضي وشيك
تاهت عويناتك علي ّوما لقيتك
ودرت بينا المسافات حس مشيك
مسكينة روحي اتشحتفت بعد الصبرونغيم غناي
واتشعلقت في زول بِعد
بعد المعزة البينا قام سوالو راي
عارفني بشتاق ليك كتير
ما ببقى إلا تكون حداي
بتناطى ليك فريق فريق وطريق طريق
ساساق عليك وما براي جد ما براي
حلنتا بتنوم بحكاويك تستريح
كل زول ينوم في خشمو بسمة
ويبدا يحلم انو انت
وهو قالك وانت قلت
وانو كان لو انت كنت
وفرحة في لأحلام بترسم ألف بسمة وألف نكتة
ومن دغش يصحى ويقشقش في فتات النوم على عيونو
ويتاوق كان يلاقيك يحكي ليك
ما براي ساساق عليك
غيمك بدفق للمساكين كسرة بموية ونبق
والفرحة منك للجهال لعب الهنابيق والورق
وأنا من لقيتك صدفة إتشهقت في ريدك
بقيت مترار بقطر في العرق
ولليل بقطر في العرق
بجارى لشوفتك سبق
وارتاح مع الحبوبة
يا حليل البتشرب قهوة الضحوة ويحمّدني الودع
حجتني بيك
وبعد حجاها الكان كتير
حجيتني انت وشلنا كل الليل حكاوي واشتياق
نتسارق الونسة الدقاق
لحظة يقيف فيناالكلام بالتعتعة
اتلافى احساس رعشتك بالانعتاق
وامسك اياديك الرهاف
وصل الحلق حد الجفاف
ووصلت بيك آخر المطاف
خليتنى متشعلق عليك
خليتنى أهواك من غلافك للغلاف
وزمنا زى قاصد صعب
قلبين بعد كتر التعب يتلاقو.. والحال اتقلب
حصل الحصل
قدر الله ما داير سبب ينزل علينا.. كرب.. كرب
والروح سلب .. تهواك لمن تحفى فى دربك ..
ورب .. ياحيطة الجالوص وقعتى
وتب قلدتى الواطة بعد الانشحاط
شوقك حرق وقاّفى فوق طولك وشاط
لا ضل يجيب الهمبريب لاقعده للبنوت على بنبر مشاط
يا حيطة الجالوص وقعتى وشفع الحلة البلقطو فى المطر
يتجارو للديوان يقعدوا على السبات
لى كسرة الست الطريتا مع حسس
ناكل ونعرق لما يغلبنا النفس
نضحك على كيفنا .. وننوم فى ضروه ضاربنا الفلس
فلسا يلملم ريدة الناس سلسله
قلبين .. قلب .. قلبين .. قلب والفاصله شوق
ياشوق حسس
ياشوقك انت الماهجس
ياقمره بتفلق نجوم
لى الليله .. عاشقك ما دقس
شوقين على قلب انهرس
والروح سلب
تهواك
لمن تحفى فى دربك وبس