لي وين
لي وين …
وكيف لمتين ؟؟
يا ضحكة ضاعت وين !
يا حزن يا مرتاح بين الدموع والعين ..
تعبث معاك الروح ..
والليل حشد سهرة ..
شباك … حلم … مقفول
حرس المسافة يطول …
للفاتو ما رجعو ..
يا سكة لي بيتنا ….
يا عتمة يا مشوار ..
يا شارع الحلة ..
ما ضاعت الذكرى …
للغابو والحضرو ..
يا قمري … يا قمرة
يا السنسمة … وحمرة
بسأل عن الأفراح !!
والخاطر المرتاح ..
عن دنيا فيها سماح ..
عن الصباح الراح ..
لا ضو … ولا أثرو
لي وين … وكيف لمتين ؟
يا ضحكة ضاعت وين ..
يا حزن يا مرتاح ….
بين … الدموع … والعين
علمنا يا مسكين ..
ورينا عايش كيف !
دي الريح وغول الزيف …
بيشتتو المطرة ..
والفكرة قلت الحق مكتوفة … مكسرة
والخطوة نحوك كيف ؟
والسكة دي خطر !
أطفالنا … والأمات
آمالنا … وأحلامنا
الهاسة والجيات …
طوالي في وكرة …..
لكن ده كلو يهون …
مهما الصباح مرهون ..
والفرحة … محتكرة
البذرة مهما يكون …
حتبقي يوم شجرة …
حتبقي … يوم … شجرة