شمايل
مصايب الدنيا والزمن البغيير
قاسي تبدل المن تبه خيير
شمايلن فينا يام حسنن بحيير
عليها بغني بالبحر القصيير
رجال من قمنا يام ديسا” مكللق
قلبنا معبى بالفرسه ومغللق
لسانا مكجن النضم المطللق
وماكتبونا فوق لستة صعللق
ازكري الفينا بالقول والعمايل
دغري دربنا مابيمشيبو مايل
بتفنى الجته وتدوم الشمايل
وكم سوينا في العزال جمايل
نضيف تاريخنا وإن درتي الادله
ما زكرونا بي ياريت وإله
كتار خلق الله إلا آمثالنا قله
لا تدهنسنا..لا مسكولنا زله
مابنقمح الفي الخير عشامه
وفي خد القيم ختينا شامه
قلوبنا نضيفه من دنس الغشامه
ولايقه علينا كل خِصل النشامه
ما بعدونا في القاسيات اواخر
لا تجهْلنا لا سخر بينا ساخر
يمين اولاد قبايلن خيره زاخر
وهيلنا التقوي والعز والمفاخر
رزينة ألسنا ما بكتر كلامه
ومرسية روحنا في بر السلامه
بتابى الغيبة والهجاء والملامه
وشهادة الزور واكل مال اليتامى
نفوسنا ابيه مابنفوت حدودنا
وإن عاهدنا مابنخون عهودنا
ورثنا الحكمة والعفو من جدودنا
وقدر ماغضبنا ماتعابت ردودنا
صفات العزه يا المبروكه هيلنا
ويوم الشوره مابحتار دليلنا
اسألي عننا البحفظ جميلنا
سودانيه نقدل فوق عديلنا