سمي قبل تخش
خت قدمك علي باب القلب براحة براحة
و سمي قَبُل تخش يمكن
يخش قبلك نسيم الروقة و الراحة
و سلم كان لقيت ميتين .. مقابر لي حبايب ماتو
خلو الدار خلا و فاتوها
نيلين من دموع و قصيدة نوّاحة
بعد تدخل .. عليك الريدة أقفل باب قليبي وراك
و ما تخلي الكلام و الريح يخشوا عليك بالشباك
و ما معروفة من عزالي يوم في غفلتك يا غالي
تخرب قلبي كتاحة
و قبال تقعد أنفضوا من فتات الناس
و من العنكبوت الباني فوق الريدة و الإحساس
و أدهنو بي الحنين الدافي
خليو زي مزاجك صافي
و ولع من هواك بخور
و أدفن كل حفرة معاك ..أصلو قليبي كان محفور
و حصّنو جوه بي يس و بي رب الفلق و الناس
و نزل شنطتك من كتفك…أكتب في العيون عنوانك
إنك جوه قلبي خلاص
دقيقة أقيف
بي باب الهوى البيغادي يمكن تلقى ليك قطية
ما ظنيت معاك مفتاحا
دسيت فيها كل الذكرى بي أحزانا بي أتراحا
خليها التكون مقفولة .. ما تقلب علينا جراحا
بكرة بجيها يوم و تروح
و بي موج الغرام تنهد
و تفضل فيني إنت براك
و أبقى معاك يد في يد
ولو حاولت تغدر بي
و تجرح قلبي يوم بالصد
بريدك من بعيد لي بعيد
و أقيم على قلبي فيك الحد