نيمة
الخطاوي البيلحقن فكرة مشيك تالا المغارب
مابيوصن ليك طير الجنه شان يحرس مجيك
المسادير الحروفن من شمس غربة كفوفك
وابتسامتك لما ريش البهجة يهجمو ضل وشيك
ما ليك حق تتقلّي في نار احتمالاتك براك
وليها حق خاطر البسيمة المْن ملامحي بتشتهيك
ليك حق تحرق مراكب النيل وما تعاين وراك
طالما موت الكلام في جوف مغاراتك وشيك
يا المعذب بي حمي الصلصال وطين الله البراك
يا المعذب بيك شان الريدة بس خاف الله فيك
حوشك العمران حكاوي واغنيات
لمة الشاي الصباح والمغربية
وصوت كبابي البت وقت تعزف ترن
وبسمتا الجاياك من روحا الصبية
المايات الخجل كفكف كفوفن
مر نسام كهربا وخلاها حية
ختت الصينية قالت : سكرك كيف؟
وانت مشغول بالحسابات العصية
فته الشاي ماشربتو وفاتتك
لحظة الامن التي فتّش ليها بي مليون ومية
وشن فايدة قرش بي غربة
شن فايدة قرش بي هم
ممحوقة البجيبا المافي
والشوق مسخ اي طعم
فاقداك البيوت والحلة
فاقدك في غنانا نغم
والبلد التناغم ليك
راجاك رد ليها نعم
ان طولت وان هاجرت
رداك اللبن والدم
الحفي بين حبايبك سترة
قمصان المحنة وساع
شقيش ماتقبل حقك
ان خضرت ليه ضراع
والحق التحرسو بجيك
مامحروس يمين ان ضاع
كيفن عاد تقول مافارقة
ترضي جروف ابوك تنباع؟
الوطن الربيت في حضنو
تنفض من ترابو كراع؟
قدر ايش الفرح بيحتاج
وقدر ايش السعادة تدور
ضاحكين ان لبسنا حرير
وكان ساترنا توب دموع
كتفك في اخوك تسندو
راكوبتك تساوي قصور
ربيان بالحلال من قمت
والنور في جناك مجرور
بين اهلك هداوة البال
ماتقطع عشانا بحور
والخطاوي بيرجعن فكرة مشيك من المغارب
نيل عروقك منو شقيش ماتفوت
لمة الجمعة النعيمية الفطور
العناقريب المشالعيب والبيوت
ريحة الحلو مر بعد ماكوجنوهو
نكهة السودان معتقة مابت موت
نيمة ضلها في قلب حلتنا شارع
قلوة البن بالظهر طق طقلو صوت
تنتنيه وكبي فنجان ليك
زمليه واديه من عينيك قوت
تنتنيه وكبي فنجان لي حبيبك
زمليه واديه من عينيك قوت
والخطاوي البيلحقن فكرة مشيك تالا المغارب
مابيوصن ليك طير الجنه شان يحرس مجيك