ماك شايف ضو ؟
ماك شايف الضو؟
بتعاين وين؟
خالتك….
اااي مرقت
جيهة الميّعَة تعدِّي بِهيمات…
ما كعب الجوّ
ااااي ما شين
في ضُلُمّة
مزرقن ضحوي اظنو بجاكر في الغيمات
البارح شالت فينا الليل..
و رعودا تسوِّي كروووو
ما سرب البارح فوقا عِجيل
ما نشَقَن ديل
من صبحتْ شايفاهن نايمات
ابواتك زردُو التاتشر فُلْ
من قُومة الديك في فجرو يصيح
و انكتحُو الريح
لي فواتح
قالو في كم زول مات
شُغل البصَّات
و شوارع كوووو
كل يوم مفجوعة بلد في صبَيّ
ي اللَّه الحيّ
هسع كم بيت أصبح بي حيّ
…..
كم صيوان في الحي قايمات؟
كم ضرا إتشال من وش الحرَّ
كم مرة صبحت في سواداً صَرّ
كم حيل مضطَّر
لي شيل اكتر
كم وجعة سِخَت بي قلوب أُمات
يا الله الحيّ
سامع يا خيّ؟
شوووووووو
ااي صبّت
هو البيت عدمان عود الكبريت
و الفيو زاتن
هَفَا و مرايمات
و تقول الجوّ جوّ قعدة معاي؟
بين شاي و مؤانسة و لقيمات ؟
اقفل ما تجيب لي صاقعة
و لو
وقفت
برجع للونسة معاك
هو أساساً غيرك ما ليّ جَوّ
إن شاء الله
الليك
عمران عندي
و ضحكاتك جنَّة
علَيّ دايمات