خطاوي الشوق

نفس النيل ..فنجان القهوه..

خطاوي الشوق ياريد فاقداك

يالعودت مسارب روحي

تهندم حالا و تستناك

أنا بكنس ساحة الهم والوحشة..

وبفتح لي عينيك شباك

وأختار قمرة حنينة وباسمة

تفر إيديها تضوي سماك

ولما تجيني أمَثِّل *رايحة*

ولامشتاقة ولا راجياك

****

كدة زي دهشة اول صدفة

وزي رفة قلب العصفور

لما يجرب طعم الغيمة

وتبقي مسامو مسارب النور

يتملك عطرك إحساسي

ويفرض نفسو بكل غرور

حاجة تحير..عطر وبساطة

وبسمة تمد للإلفة جسور

****

يوماتي بتكبر احلامنا

ومنظر بيتنا ملامحو بتوضح

الوطن المعناه حضورك والريد

الجواي يتفتح

ويبقي مداين ليل الفقراء

اللون خاطر الوجع البينتح

بلسم ناس كالحات أيامهم

و قدر الهم بسماتهم مسرح

طاقة ريدنا إذا لاقاها

ضلام الحزن الكالح .. يفرح

نفس النيل..

فنجان القهوة..

خطاوي الشوق ياريد فاقداك