هو وين شبهك
ياخي نقول
في زول قابل معاك كم زول
وقبل يجيك قابل زول معاو كم زول
وقبل يقول سلام ياناس ..
قاطع نضمو واحد خاف وقافو يطول
ونادي وسمّع الحاضرين :
خلاص يا اخوانا ما معقول ..
.. أها شفتي
الزول ده مش ماشاف عيونك ديل
ده برضووو عزول
بغير منو ..
وبدعي عليهو طول اليوم
محل مايمشي حتة ينوم
ويحلم بالقيامة تقوم
ويمشي علي الصراط يعتر
ويسلخ جلدو الف سموم
يقيف يبدا الصراط تاني
يلاقي ملايكة بناديهو :
سقطتّ وإسمك المحروم
ويصحي علي الإرض وشو
عليهو تعب .. وهم مردوم
ويزحف وجسمو موية ينز
يقوم محموم يبيت محموم
كدي .. نخلي
ياخي نقول ..
في خمسة غشوك
وقبل يجوك
قابلو ناس .. بسألو عادي من بيت ناس
هوززو راسم البنوت .. ما عارفين
وجاهم واحد اسمو الياس
طلع شيخ حلة يا الزينة
وصفو مجهزو فـ كراس ..
أها ,
شفتي الياس
زول مبروك
وفيهو صلاح
ولوقال انو هسع شيخ
بكون في النص مع المداح
ويمشو وراهو الف مريد
وبكرة بيبنو ليهو مسيد
أها شفتي الناس ؟
وشيخ الياس ؟
يكون في عيون نديداتك
شافو بواقي نور محيك
وفرحة في وش سماح وصباح
وعم الياس تقي ومبروك
وفيهو صلاح
بكون يا ستي اتخيل
هناك في الجنة حور زيك
جزا البتعبدو وصلّاح
بغيييييييييييير منو
وابعد ما يكون ظنو
انو في زول بيدعي عليو
وانو عيونو إتجنو
وهبشو مكان ( صعب أعفي )
وكل الناس دي بتمنو
عيون شبه الجنان واسعات
علي بالفرحة ما ضنّو
كمال البدر وصفو بيك
وهمس حواسي حافظنو
وكوم من نور تجاه ثغرك
مخلي مشاعري بيك جنو
ألف من بين خلايق الله
يبين من شكلي بس إنو
مطفح فوقي ريدك بوح
وحتي الغربا كاشفنو
وعارفين إني بيك مليان
هو وين شبهك .. واسمو منو