فلخ الكربكان
فلخ الكربكان مييل عليها شخيب
سررح تفته وسفف عدوها الخيب
كفاي ابقلوت فى الليد علالو سخيب
جابن فى الترابله السرحه والنخيب
ابقيدوم بعد عرك ابجداد الغيم
جلدنو البفشن لى المحول الضيم
الضلله الخلن من نمله دابيه وهيم
إنفرشن برم جبر النحل لى الديم
مالت على وادى العروس بى رعود
سرفتهن تروس الصادقه ماها وعود
وين ما فات سحاب دامع رفيقو بعود
قفلا فى الجبال قوود بعد مو عود
أميكح الرنخ من زايفة العوتيب
ساطنو الدكن بارقه وهمى وقنتيب
الولد القبيل غنولو يا التاتيب
جمع الحنبكن حالبه وركوب ولتيب
الرعد البشتت فى الحجار شتييت
ترسملو البروق فى دربو بى الختييت
الراعى اللكان زادو النشاف ؤحتييت
لبنو بعد مقنن خاتى من رتييت
البحر الصبح تيارو ليهو نفيف
دخلت موجتو فى أنف الشرابو صفيف
وردنلو السيول طارحات كتير ؤلفيف
حتى الكور صبح من العكاره كفيف
الجرف المتل كف الوزن سبروقو
إتكررس رتيل بدت العصاصه عروقو
تربالو البخود ضاق المرير فى مروقو
زول السوق إحسب مالفق لى فروقو
ابو طليح بعد صبنن سنينو عجاف
مده لسانو فوق قلع ابحميد الجاف
جربوعو إنخلع فارق جحورو مجاف
وإنقطعن كبن عاكسه النجوم أنجاف
فى أبهجليج ضلالا لما قالبه زراق
تتعاقب بروق حس البدودو راق
شاعرا موضرس كيف ماجمعلو اوراق
بتقولو الطبيعه إن ما صبرته فراق
ودي الله دععاشو إنطلق ياداب
زازاهو البقرجم ؤطلعو السيداب
برقا فوقو متعسسم تقول ديداب
ؤكركم قلعو فوق حيب الحقايب داب
الرويان روا وروس القرون منغسله
معروف العيين خاتى الذنوب مى فسله
لى البابلوس وقلته وابفرود كان اسله
عقلى يكون مودر ؤمابتوصلو وصله
قرينات والكحيله وام عرايش زاته
دق الصب ركز بى صبوه لامن فاته
جبال ام عب مع ضهر الحميير خاته
حوبة الخف هناك لازيق جلد لا باته
ممكون الجنوب من بدرى جات اخبارو
حايم فوقن الركمى الكسر معبارو
بعد ماكان مقننع لى الكتير بى غبارو
أهل النعمه زي حال السحاب إتبارو
قالو الشرق من عينه تنجح عينه
جابرة الحديد من وحله الله يعينه
من ايام كتار ابت النعال كرعينه
محل ماتفر على جيه بتلاقى ضعينه
اخبار الغرب دى المى شهادة زور
مترادف سحاب والرعده اسدا إزور
قوز كردفان طربان فروع ؤجزور
والسلوكه تخلف والتغنى بذور
أهل النعمه هبو على العوالى خفاف
عفاية القش بخبرو المن سلاله عفاف
مرقو الكان مصببن فى جراب ؤقفاف
عيشة الدنيا تحلا إن كان حلال ؤكفاف
سيد السارحه حظو والترابله سعاد
وأهل القافيه غنو على المحجله عاد
ست البيت مشمره مافى تانى قعاد
نحن وإنتو نصبح من ضناكه بعاد
الجنيات تكدب والخشيش فى التايه
والمرحات تجاوب فى تلوود نايه
ناس البدرى وتدو شابة الحاحايه
حصن الشاب ؤحجيج الشياب هن غايه
الشفع بدولن فوق قووزن قصه
قانون الصبا سهر المقممره نصه
طير النيل على دلجة بلال إترصه
حتى النوم على عين الكبار إتعصه
القطا والأرانب والرهو فى القلعه
تابخات الأمان المابحووج ولعه
الفرراخ إناتلن فى العشوش لى الطلعه
واب زمبور إلققط والقبور واب صلعه
اهل امروبه فى باحة الكبير إتنادو
ناوين الرحيل امرا زمن معتادو
الحامينى غمده والشراب كان زادو
بعد القربو أبعد والهموم العادو
ماها العاده أشوفه علا ساي بتخييل
كم ناجيت عشانه قمرى شارف القيل
المغفوره عفه على البدور إتحييل
بينى وبينه عقبه ؤوادى قدرى السييل
كل ما قول صبيحه على الصباح تترفع
وكل ماقول بريئه ألقاها شافعة شففع
كان داير نفاعه ومستحيل تتنفع
قدح الجود بجيكه وتانى عل تتصفع
بينى وبينه أصبح علا ساهى تذككر
حزن الماضى بيين مابفيدنى تنككر
كلما اقول مرقته دعاش إزيدنى توكر
جمر الغي بلوكو إن كان بعقبو تشكر
كم فى القلعه جالس علا وزرى النجمه
شهاب القبله طابق لى عدوهو الرجمه
المنداح فصيحا والقوافى العجمه
شان ام روبه تهجم فى البواطن هجمه
أسفا صارو خاتالو الدواخل لايحه
كان فكيتو إسكت لى المجرحه نايحه
عشان تلقاله من فوح المحشمه فايحه
تقبض أنفى فى النسمه المغاديه ورايحه
بت الأمسو سالين السخايم نامو
كم بى عجله فوق درب البناغم قامو
مرقو المارقه بى رضوه وبصلو وصامو
فوق الشبهه والبتلوم أبد ما حامو
عز الناس رضاها بى الإله ؤسجوده
القسيانه فوق راس الهلاكه هجوده
كم جبناها دون نجده وقست منجوده
مانى بصر وشيى عشان طليبة طالب
ولاببزملى قولا منو أصبح قالب
كم دافر مراحا ؤكم مصرر ؤحالب
ؤكم ضايقلى جوعا لى التنوود سالب
ود البعفو مابسوو الفضيله سداد
ود الهلكو فى حكمه ونصيحه مداد
ود البزلو لى ناوى القطيعه وداد
ود الخلو شكراتا كتيره كداد
ودالصالو بى غر الخيول يوم كورتى
ودالبسندو الإتنين بطايا وثورتى
ودالسترو عرض الغير وبيهم دورتى
فوقن غير اقول آود ابوك ان شورتى
