البنات
جزم ان ما البنات فوقن نظمنا غناهن
كنا نفوسنا من حلو الوجود لغناهن
لذاذة صدهن للجوف نبال وغناهن
احلى من القروش في عدمها ولا غناهن
وخلن كل قلب بسرو قنب يبوح
وفي غر المنام بالريدة ساكت يلوح
مالنا عليهن الزاكيات عطرهن يفوح
نبكي نهارنا جت والليل نشيلو ننوح
لولا هن ما كنا ولم نتدارة
وما كان قيس وعنتر نجعو من الدارة
اي نعم النواجل للبريد ودارة
لكن حبهن نظم حياتنا وادارا
وجديا بالعسايل شوقي أعلن حربو
محسور منو يا فجاخ وراح لي دربو
المابي البنات دجال ودينو يخربو
هو النبي في الغرام شحد العذر من ربو
وجارين فوق شنو وخامين نفس بتتحو
واحدين بالصقيع واحدين ينوحو ويوحو
الداير الغنى وباني العمار بي صحو
كايس ليم ولية دوفو شوق بتلحو
وشوف صورة النساء وارجع عقب للتوبة
تلقى إلهنا وصاك بالمحشم توبة
ما تمسكو العيوب البيها بتنتوبة
رفقا بالقوارير اصلو م سمعتوبة
مين غيرهن نفوسنا على الدرش قواهن
ومين غيرهن بروق عسر عليك ضواهن
لو لا هن قط م كنا من حواهن
وما كان الله من ياسر الضلع سواهن
بدن بي عفه وإخلاص للبوفي وصانهن
كم كضمن غيوظ للنفسو كلبه وخانهن
وصانا الرسول كيفن بنغسل رانهن
الصانهن كريم، ولئيم غشيم الهانهن
ولا تنكد عليها وبالبعاد تهرسا
ولا ترميها بلسانك بشيش درسا
ان بدور ورودا تشيل قبل تغرسا
اخلص ليها و اديها الثقة التحرسا