بواعدك
صفاء موسى بيلو
بواعدك ياجميل الروح
اجيك قبال تروح الروح
اكون متجدد الاشواق
مخلف من ورايا جروح
لاني الديمه بشتاق ليك
واخجل بي كلامي ابوح
اواصلك من بعيد وقريب
لو لي لقايا ما مسموح
واطلع لي وصالك دوووم
واقطع في الفيافي سفوح
اشيل منك حزن مرا
واعالج قلبك المجروح
اجيك امسح دميعاتك
واكسف ضحكة الشمات
منوا الزيك يشيل روحي
وينفخ في قليبي المات
بجيك ازرع شتيلاتي
ونحميها من الافات
اشيل منك حزن مرا
وما برجع خلاص الفات
وازرع للفرح ريدي
واهديك مني ليك شتلات
اغني معاك غناوي الريد
نعلي ونرفع الاصوات
نهيم نضرب مسارب الروح
نعالج الفات من سنوات
ما انت البتستاهل
اقطع لي لقاك بحور
جمالك ديمه اسرني
بشر.وملاك كمان من حور
غصن ميال يداعب الريح
مفرهد كاسي ليه زهور
جمالك اصلوا ما مرا
سنين ايام معاها دهور
بريد اسكن قليبك دوم
سكن دايم وما مأجور