الحنين جواك

والحنين جوّاك شَخَت في العين كَبَارِيت الدّموع ..

نَقنَق حَطَب كُلّ القَطَاطِي الفي خيالات النّزوح ..،

نادَن رَوَاكيبي المَطَر ..

قالَنلُو أنزِل ،

اكان طَفيتنا بِنَنسَتِر ..

إلّا السّحَاب كان وَجَعُو حاتِل في الضّلُوع ..

بالشوق قَطَع حبل الوَرِيد ،

وصباحنا جَا ،

ولِسَّه الشّمِس ما دَفَّقَت في بيوتنا ضَو ..،

ولا كَشكَرَت ساي ل السَّمَا المَليانة حُب ..،

والخوف قَفَل باب الطلوع ..

يا نِيل اقِيف ..

اقرعنا مِن هَمّ الفُرَاق السَّال نَزِيف ..

خَلِّي المَرَاكِب تَلقَىٰ لي أحزانا قيف ..

قول يا لطيف ..

كَسَروا البَلَد

قُبَّال تقوم تِتمَطَّىٰ علي حيلَا وتَقِيف ..

وايّامنا عاد

في الغُربة لا بْتِنعَدَّ ، لا بْتِنهَدَّ

لا بْتَعرِف رَبِيع ، لا فارزَة صيف ..

وكُلّ البِلاد ما زَي بلَدنا ، ولا بْتَكُون ..

وكُلّ البلاد ما بْتَدِّي حُبَّهَا للبِخُون ..

يا روحِي ما تدسِّي الحَرِيق

خَلِّي الشوارِع فاتحة ساي ،

شان نِحنَ راجعِين تاني لي حُضن البَلَد ،

يا إمَّا بالصّاح نَعشِقَا ، أو لا نَكُون ..

30 مايو 2024