الدنيا مدرسة

حقيقه الدنيا مدرسه ،، والزمن دراس
والناس لي بعض زي الجسد ل الراس
بمش غادي البكوس، لي خوة الفراس
ما بنقي الرجال ،، من خيمة الاعراس

نوع الكفو ،،،،، من فعل المكارم حابسو
لا تعوم جوه بحرو ولا تمش في يابسو
الكايس البنصرو، وكت عدوهو يكابسو
ما بقيس الرفيق، بي جيبو ولا ملابسو

خاوي الكارب، ال مالفه يوم لا دار
ببقالك ملاذ ،،،،، كان ساءت الاقدار
احذر خوة ،،،،،،،،، الما عندهم مقدار
عدو م بخون اخير من الاخو الغدار

ان بتخاوي نوع ،،،، الخدو ناير و نادي
مهندك الظريف ف الحاره بيبقي هنادي
الداير رفاقه ،،،،،،،،، يجوهو قبل ينادي
ما بعزل وانقي ،،،،،، رفاقتو من النادي

جدار الخوة لو بتدورو يبقي سميك
ما تخلي المظاهر ،، والقروش تعميك
مرات ال تظنو، من الخصوم بحميك
هو الخصم البيحفر ليك عشان يرمك

فتش ونقي ف الدايرين اجو يحالفوك
شان وكتين تقع ،،،،،،، ما تعدم البلفوك
بعض الناس اكان جيبك غني بوالفوك
وان فلست ،،،،، لا اخوانك ولا بعرفوك

سلاح الخوه ،في بيتين نتايجو انحصرو
يا انهزمو البقع في كفهن ،،،،،، يا انتصرو
الداير رفاقه ،،،،،،،،،،،،، بركزو كان انعصرو
بقيس ب عقلو م يقيس الرجال ب بصرو

الاخو ماهو سلعه ، بجيبو من السوق
ولو تيراب ادسو الزارعو ب الواسوق
الاخو ان كريم كفو ،،، وقوي وموثوق
ما مهم ان بمش كداري ،،،،، ولا بسوق

فانيه الدنيا لابد ،،،،،،،،، والاجل محدود
والما عندو ،،،،،،،، والغنيان مصيرو الدود
بعد يلقاك اخوك ، طربان وباش و ودود
ما مهم جيبو تاني ان شاء الله لو مقدود

الخوه ان بقيت ببسي ومشاوي ومرقه
لا بتحل قضيه ،،،،،،،،،، ولا بتسد الفرقه
الاخو سيف وركازة ،،،، وعصايه ودرقه
ما بتنقاس يمين قيمة الرجال بي ورقه